Driver sa motor patay human mibangga sa cargo truck

DEAD-on-arrival sa Carcar City District Hospital ang usa ka drayber sa motorsiklo human mibangga sa cargo truck nga naka-park sa daplin sa dalan sa maong dakbayan.

Si PCpl. Argie Noel Espinosa sa Carcar City Police Station nga nahinabi sa Superbalita Cebu miila sa namatay nga si Rogelio Zapanta, hingkud ang edad ug molupyo sa Barangay Abugon, lungsod sa Sibonga.

Samtang ang drayber sa trak nga kasamtangang gipriso na karon sa Carcar City Police Station nailhan nga si Roel Leong, 29, lumad nga taga Barangay San Miguel, lungsod sa Bacong, Negros Oriental.

Matod ni Espinosa, si Leong niasoy nga nag-parking ang trak sa daplin sa nasudnong dalan sa Sityo Lagang, Barangay Bolinawan sa maong siyudad mga pasado alas 10 sa Sabado sa gabii tungod kay dunay giayo niini.

Wala magdugay natingala si Leong sa kusog nga buto sa likod sa truck hinungdan nga dihang gisusi niini kon unsa nga tingog kadto nga buto, nakurat si Leong sa iyang nakit-an.

Dugang ni Espinosa nga tungod sa kahadlok niini nangita kini og pamaagi kon kinsay makadala sa biktima sa ospital human nga mibangga sa truck niini dayon pahibawo sa kapulisan sa maong siyudad.

Rason ni Leong ngadto sa mga pulis sa Carar nga dunay gibutang niini nga warning device sa dalan nga iyang sinina kadtong dunay reflector sanglit mingaw naman ang dalan tungod kay walay nagbiyahian na kaayo nga mga sakyanan. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph