GIKLARO ni Cebu Governor Gwendolyn Garcia nga way gipatuman nga lockdown sa lalawigan sa Sugbo. Ang gipatuman mao lang ang community quarantine ug social distancing, matod niya.
Busa di angay nga mag-panic. Sumala pa sa health experts duha ang angay nga kontrolahon sa higayon nga dunay pandemic sama sa corona virus nga moresulta sa sakit nga Covid-19.
Mao kini ang pagkontrolar sa pagkuyanap sa virus ug sa panic sa katawhan. Maayo na lang nga duna kitay lider nga sama ni Governor Gwendolyn Garcia nga mogiya sa katawgan. “Listen to your governor,” matod pa niya.
***
Apan gimando sa gobernador ang 24 oras nga curfew alang sa tanang nagpangedaron og 65 anyos pataas, sa tanang mga estudyante sa elementarya, high school, kolehiyo ug bisan kadtong sa post-graduate nga way trabaho.
Sa laktod, kon way trabaho ayaw og laag. “As much as possible, stay at home. Kon di importante ang inyong lakaw, pabilin lang usa mo sa balay kay posible nga carrier na ka. Kini protection ni alang nimo and for your family,” nagkanayon ang gobernador.
Ang dako nag pangedaron mao ang labing vulnerable, ang labing daling takbuyan sa corona virus. Pero ayaw pagsalig kon batan-on ug baskog pa kag lawas kay kon di ka masakit, mahimong carrier ka sa virus.
***
Sumala pa sa taho ning maong mantalaan, niabot dinhi sa siyudad sa Sugbo ang 40,000 ka mga Covid test kits pinaagi sa Office of the Presidential Assistant for the Visayas.
Ang 20,000 niini gigahin alang sa Cebu City Government. Ang nahabiling 20,000 alang sa ubang bahin sa Central Visayas.
Karon mahibaw-an na gyud kon si kinsa ang adunay coronavirus kay matestingan na man. Mahibawo na kita kon si kinsa ang angay nga i-quarantine aron dili mokuyanap ang corona virus.