ANG Cebu City Council nipasar og resolution sa pagtugot ni Mayor Edgardo Labella aron tagaan og financial assistance ang mga adunay Influenza Like Illness ( ILI) nga maoy usa sa timailhan nga posibleng sa Coronavirus disease 2019 (Covid-19).
Si Konsehal Niña Mabatid, vice chairman sa committee on health, maoy nipalabang og resolution sa konseho aron pormal nga awhagon ang executive department atol sa ilang special session sa miaging semana.
“To authorize the Mayor of the City of Cebu to sign any and all documents in order to enforce and implement the foregoing resolution,” tipik sa resolution ni Mabatid.
Base sa record sa City Health Department, niabot na og 10 ka Influenza Like Symptoms (ILI) diin siyam niini naa sa tambalanan ug usa ang gi-isolate.
Samtang, ang 39 ka mga ILI kon Person Under Monitoring (PUM) gikan sa 19 ka mga barangay sa siyudad apan giklaro sa opisyal sa City Health nga wala pay kaso sa Covid-19 ang dakbayan.
Si Mabatid nagkanayon nga magdepende na ni Labella kon pila ang ihatag sa siyudad sanglit dako kini og ikatabang kay naa sila sa tambalanan ug ang mga PUM walay trabaho kay naka home quarantine.
Si Majority Floor Leader Raymond Garcia niingon nga ang konseho nigahin og P1 bilyon isip pundo sa siyudad ug pagtubag sa panginahanglanon aron mabatokan ang Covid-19.
Wala pa mahukmi kon pila ang itabang sa dakbayan apan, segurado nga magamit kini sa gi-isolate nga tawo human wala na usab kini trabaho tungod sa pagpakuwarentina.
Sa pagkakaron, nagpadayon ang kampanya sa dakbayan batok sa Covid-19 lakip sa pagpanglimpiyo o disinfect sa publikong dapit labi na sa mga merkadong publiko nga nagbaligya og pagkaon.
Gawas sa kuwarentina, hugot nga gipatuman ang curfew ug pagkanselar sa mga dakong kalihokan sa paglikay nga matakdan sa sakit. (PAC)