UPAT ka samples ang gipadala sa Department of Health (DOH) 7 sa Research Institute of Tropical Medicine (RITM) alang sa pag kompirma kon nag positibo ba kini sa coronavirus disease 2019 (Covid-19).
Samtang, ang 46 ka samples nga gisuwayan sa bag-o lang niabot nga test kits, negatibo ang resulta.
Kini maoy gipahibawo ni Dr. Jaime Bernadas, director sa DOH 7, atol sa press conference sa Marso 21, 2020.
“Apan usa kakulian tungod bag-o pa, pirmero nga mga test naa gyuy questions nga dili klaro so, gipadala nato sa RITM for confirmation,” matod ni Bernadas.
Sa padayon nga pag-abot sa mga Overseas Filipino Workers (OFW) mipasalig si Gobernador Gwendolyn Garcia nga abagan sa lalawigan ang pag-quarantine ug pag pauli sa mga pasahero sa mga lungsod o probinsya niini.
“Ang uban nga niabot nga mga Filipinos nga padulong sa ilang mga kaugalingon nga probinsya ug dili dayon makaadto, ato ni sila ibutang sa usa ka lugar, ipaubos sa quarantine hangtod nga atong mapahimutang ang passage nila pagawas sa Cebu unya ang probinsya sa Sugbo maoy motubag sa ilang galastohan,” matod ni Garcia.
Mopadayon usab ang pagpatuman sa protocols sa tugpahanan pag-check sa mga visa ug passports niini aron masuta ang travel history sa mga pasahero.
Tungod sa padayon nga pagsupak sa drivers ug commuters sa estrikto nga gimando nga social distancing, gihangyo ni Eduardo Montealto Jr. ang pangu sa Land Transportation Franchising and Regulatory Board (LTFRB) 7 sa pag kuha og hulagway sa drivers, sa jeep ug sitwasyon sa pagsakay og i-report kini sa buhatan.
Pahamtangan sa penalty nga moabot sa P5,000 ngadto na sa P30,000 ug kanselahon ang prangkisa niini.
Gihangyo usab ni Victor Caindec, pangu sa Land Transportation Office (LTO) 7, nga mosubay ang mga motorista ilabi na ang mga pribado nga sakyanan pagpatuman sa social distancing kon dili dakpon usab kini sa sakop sa buhatan ug sa kapulisan.
Aron nga wala na’y ikarason ang mga tinun-an sa pagbisita sa internet cafe, gihangyo ni Garcia ang Department of Education (DepEd) sa lalawigan nga hunongon na ang pagpahigayon og online classes.
“Dili ni pnahon nga mag- outing outing kay wala moy klase, kung mogawas mo, madakpan mo sa pulis. Aron walay mga studyante nga moadto sa internet cafe, I am directing to immediately stop this online classes,” matod ni Garcia.
Suportado usab nila ni Mandaue City Mayor Jonas Cortes ug Lapu-Lapu City Mayor Junard Chan ang mga lakang pagpatuman og mas hugot nga measures batok sa Covid-19.
Matod ni Cortes, gikinahnglan nga hiusahon nila ang ilang desisyon aron malikayan ang kalibog.
“If we do ingress, egress, ma- deplete ang funds nato if mag- iyahay ta. Kinahanglan nato i-align ang decisions,” matod ni Cortes.
Mihangyo ang kadagkoan sa Sugbo og pag-ampo, suporta ug kooperasyon sa kamandoan nila alang sa pakigbatok sa Covid-19 sa Sugbo. (ANV)