GIKOMPIRMA sa hepe sa lungsod sa San Remigio, PCapt. Elpidio Tago-an Jr., nga anaa sa usa ka punenarya sa ilang lungsod gibutang ang usa ka mag tutudlo nga gikonsidera nga Persons Under Mornitoring (PUM) ug kasamtangang nag-self-quarantine namatay kagahapon, Dominggo, Marso 22, human giataki sa kasingkasing.
Matod ni Tago-an, subay sa impormasyon nga gihatag sa ilang doktor sa lungsod, ang namatay usa ka high school teacher sa usa ka tunghaan sa lungsod sa Daanbantayan ug dinha lang gidala sa punenarya sa ilang lungsod.
Nailhan ang biktima nga si Edmund Apura, 41, ug molupyo sa Barangay Maya, lungsod sa Daanbantayan kon asa siya nagtudlo samtang mga kaliwat sa namatay anaa nanimuyo sa San Remigio.
Dugang ni Tago-an nga base sa datus sa ilang doktor nga ang maestro gikonsiderar nga PUM tungod sa iyang travel history gikan sa Tuguegarao City paingon sa Manila pabalik sa Lapu-Lapu City ug pauli sa Daanbantayan kinsa nakabalik lang niadtong miaging Sabado.
Hinungdan nga boluntaryo nga mipailawom sa usa ka self-quarantine si Apura nga unta naa sa ikaunom ka adlaw na niini niadtong Sabado human nagsugod sa pagkwarantina apan namatay siya pagka Marso 21 sa buntag human nga giataki sa kasingkasing.
Ang mga hingtungdan ug kabanay sa namatay nasultian na sa ilang angayan nga buhaton nunot na sa paghimo og depensa samtang ihaya ang maestro. (B)