DILI na makagawas sa ilang balay ang mga senior citizen nga nag-edad og 65 anyos pataas ug mga menor nga nag-edad og 18 anyos paubos sugod kagahapon, Dominggo, Marso 2, hangtod Abril 14 ning tuiga sa tibuok dakbayan sa Sugbo.
Kini ang unod sa Executive Order 059 ni Mayor Edgardo Labella niining padayon nga pakigbatok sa Cebu City Government sa hulga sa Coronavirus disease 201 (Covid-19).
“A stay-at-home order imposed upon senior citizens aged 65 years old and above and minors within the City of Cebu,” ang ulohan sa EO 59 ni Labella.
Ang Cebu City adunay di mominos 80,000 ka senior citizen nga nag-edad og 65 pataas.
Apan walay labot sa maong EO ang mga elected official, authorized government officials, senior citizen occupying key position in private establishment, medical practicioner, hospital workers ug volunteers para sa emergency response.
Mahimo lang makagawas ang senior citizen ug minor sa ilang balay kon sila nanginahanglan og medical attention.
Si Police Colenel Hector Grijaldo, pangulo sa Cebu City Police Office (CCPO), nagkanayon nga kon adunay mga senior citizen nga ilang makit-an, dili nila dakpon sanglit dili sila kriminal apan ilang ihatod ngadto sa ilang balay.
Ang mayor nipasabot nga stay home kon puyo sa balay ang iyang gipatuman og dili curfew sanglit ang Cebu City nipatuman na niini gikan alas 8:00 sa gabii hangtod alas 5:00 sa buntag ug ang stay home para lang sa mga seniot citizen ug mga minor.
Si Labella nipasabot nga kinahanglang hipusom sa tanang oras ang senior citizens ug minors sanglit sila ang dali nga mataptan sa sa Covid-19.
Samtang sa laing EO-060, giawhag ni Labella ang mga employer sa private establishment nga dili una patrabahuon ang mga senior.citizen sugod ugma.hangtod Abril 14.
Isip modelo, ang City Government pinaagi ni City Administrator Floro Casas Jr. ug Dianne Ortiz, pangulo sa Human Resource Development Office (HRDO) nga di na patrabahuon ang mga senior citizen nga empleyado sa City Hall lakip ang job order sugod karon, Marso 23.
Apan makadawat gihapon sila sa ilang mga suweldo ug benepisyo gikan sa siyudad.
Matod ni Labella nga pinaagi sa paghipos sa mga senior citizen ug minors, taas ang posibilidad nga malikay sila sa makamatay nga sakit.
LAPU-LAPU CITY
Susama sa dakbayan sa Sugbo, sugod alas 3:00 sa hapon, Dominggo, Marso 22, gidid-an na sa lokal nga kagamhanan sa dakbayan nga mogawas sa panimalay ang mga menor de edad, tinun-an, ug katiguwangan nga nagpangedaron og 65 anyos pataas.
Gipahibawo kini ni Mayor Junard “Ahong” Chan atol sa iyang public announcement nga gipaagi og Facebook live pasado alas 12, Dominggo sa kaadlawon.
Giklaro ni Chan nga dili applicable ang maong mando panahon sa emerhensiya, exempted sab ang mga magpa-check-up ug magpatambal lakip na ang mga mo-escort sa mga masakiton. Wala sab labot ang mga trabahante o mga working student basta magdala lang og company ID o certificate of employment.
Matod ni Chan nga usa kini sa mga lakang sa dakbayan alang sa paglikay sa pagkatap sa Covid-19).
Laing executive order usab ang giluwatan ni Chan nga “mo-limit sa mga kalihukan nga moresulta sa panagtapok sa katawhan sa pampublikong lugar.”
Sugod kaganihang alas 12:01 sa kaadlawon, Marso 23, temporaryong gipasirhan sa dakbayan ang mga Internet cafe, barbershop, beauty parlor o salon, spa o massage parlor, fitness o sports gym, casino o pasugalan, mall, department store, shopping center, karaoke bar, ug night club o uban pang mga establisyemento nga adunay ilimnong makahubog.
Lakip sab nga pasirad-an ang mga dental clinic subay sa kamandoan sa Philippine Dental Association.
Gitataw ni Chan nga ma-revoke ang business permit sa mga establisyemento nga mosupak sa maong kamandoan.
“Kinahanglan nako ang pagsabot sa striktong pagpatuman niining atong mando kay dili kita maka-afford nga mabutang sa peligro ang panglawas sa katawhan,” asoy ni Chan.
Giawhagsa mayor ang mga apektadong establisyemento sa paghatag og 13-month pay sa mga empleyado niini.
“Subay niini atong gihangyo ang maong mga establisyemento sa paghatag sa ilang 13-month pay para sa ilang pang adlaw-adlaw nga pangkonsumo samtang wala pa silay trabaho,” asoy ni Chan.
Walay labot sa mando sa mayor ang grocery store, supermarket, pharmacy, hardware, banko, kan-anan, medical clinic o laboratoryo, money remittance o foreign currency exchange center, ug mga government agency nga nag-operate sulod sa mall.
Gihangyo ni Chan ang publiko nga magpabilin sulod sa panimalay. (Dugang ni NDT)