GUMIKAN sa hulga sa coronavirus disease 2019 (Covid-19) rason nga gipatuman ang social distancing sa mga biktima sa sunog sa Barangay Lapaz 2, Kolambog, Lapasan, Siyudad sa Cagayan de Oro.
Anaa sa 13 ka panimalay ang naugdaw samtang duha ang partially damage.
Anaa sa usa ka milyon ang natalang danyos diin 153 ka indibidwal ang apektado.
Gibutyag ni Lapasan barangay administrator Jeff Baconga nga tungod sa Covid-19 rason nga gipangitaan og paagi nga mapatuman gihapon ang social distancing sa mga biktima sa sunog.
Giingong dako man ang main covered court rason nga wala naghuot ang mga biktima gani duna sab sila'y gipahimutang nga foot bath sa pagsulod sa maong evacuation center.
"Yes naa sila'y social distancing, naa sila sa main covered court," matud ni Baconga.
Gidugang pa nga kasamtangan lamang kini sila sa maong dapit tungod kay gitakdang ibalhin sa tunghaan.
"For the meantime but they will be transferred to East City Central School," dugang pa.
Gisuta pa sa tinugyanan sa Bureau of Fire Protection (BFP) ang tinuod nga tinubdan sa nahitabong sunog.