SA BAG-ONG talaan sa mga balita karon, sa 190 ka nasud sa tibuok kalibutan, 140 na ang hitakdan niining makamatay nga kagaw ang Coronavirus Disease 2019 (Covid-19).
Niining panahona, hilabwan na ang China kung asa gikan kining maong kagaw sa Italy nga mitala na og kapin sa 40,000 ka tawo ang buhi nga nataptan, ug kapin na usab sa 5,000 ka mga tawo ang nangamatay, kamatuoran nagpadala na ang China ug mga eksperto nga mga doktor sa Italia aron tabangan ang maong nasud sa epedemya.
Dinhi sa atong nasud sa Pilipinas, salamat sa atong Labaw’ng Makagagahum kay sa total nga gidaghanun sa nagpositibo sa maong kagaw, wala pa moabot sa usa ka libo.
Nagpasalamat kita sa atong halangdong Presidente Rodrigo Duterte sa iyang mga ideya sa total lockdown, aron dili mukoyanap ang maong sakit, daghan tinuod ang nagbagolbol niining maong sitwasyon, pero ang gibuhat sa presidente dili para sa iyang kaugalingon kon dili para sa atong tanan.
Dayag nga ang Covid-19 ang nakapahugno sa atong ekonomiya, apan dili lang sa atong nasud, hangtud ang ubang mga nasud sa kalibutan nga gihugpaan niining maong kagaw.
Hugno ang ekonomiya, dinhi sa ato, kinahanglan mangandam kita kay dili kalikayan ang atong nasudnong badget, posibleng maapektohan, tungod kay daghang mga magpapatigayon nga nanirado sa ilang negusyo.
Sa mga oposisyon nga namolitika, walay laing gihimo kun dili pulos pagsaway kung wala naman lang mo’y ikatabang mas maayo pa’g magpakahilom.
Sama ni bise presidente Leni Robredo nga mga doctors daw ang ipamutang sa mga kalsada, dili pulis ug militar, mas maayo nalang nga wala siya tagda sa atong presidente kay walay unod ang gipanulti.
Dapat natong hinuktokan pag-ayo, nga dili kini sala sa atong gobyerno kining usa ka dakong trahedya nga atong giatubang karon, mao nga magtinabangay kitang tanan, magtuman kita kung unsa may balaod nga gipatuman sa atong kagamhanan, karon.
Sa Digos City, atong nahinabi si Mayor Joseph Fortich Cagas sa tulomanong 'Kontra Balanse' sa dxOW; nagpahigayon usab siya og community quarantine sa tanang mga barangay nga sakop sa dakbayan sa Digos, agi'g pagtuman sa panawagan sa atong presidente.
Hinuon nangayo og dispensa ang mayor, nga sa pagkakaron nangita pa siya og solusyon nga makapundo og kuwarta para sa mga trabahante nga "no work, no pay", nga walay income para masustiniran ang ilang pamilya.
Dugang pa sa mayor, nga may mga milyon silang kuwarta nga donasyon pero kadto alang sa mga biktima sa linog sa milabay nga tuig.