4 sugarol wa mituman sa ‘social distancing’ gisikop

MAGSAYSAY, Davao del Sur – Gitinuod na sa kapolisan sa lugar ang mga nagmagahi sa pagtuman sa community quarantine ug social distancing hinungdan gisikop ang upat ka mga lalaking nagpahigayon og mahjong didto sa Brgy. Dalawinon, alas 12:35 sa hapon, Biyernes, Marso 20.

Si Major Jeffmar Tercero, hepe sa Magsaysay Municipal Police Station, nag-ila sa mga dinakpan nga mao sila si Gary Atamosa Nasol, 42; Wilfred Buenavista Gagaa, 51; Margeto Gajes Villacora, 32, ug Bryan Montero Pantinople, 34, pulos molupyo sa lugar.

Narekober sa posisyon sa mga suspek ang usa ka mahjong table, mahjong pad, usa ka set nga mahjong cards ug salaping balor sa P315.

Matod ni Tercero nga atubangon sa mga suspek ang kasong paglapas sa RA 9287 kun illegal gambling law.

Sa pikas bahin, gi-imbestigahan na sa kapolisan sa lungsod sa Bansalan ang usa ka internet installer nga nag-post og fake news sa social media.

Sa post ni Gregorio Algones Jr., sa iyang Facebook niadtong Marso 18, gitataw niini nga positibo ang Covid-19 sa lungsod human adunay taga Km. 82 sa Brgy. Marber nga gidala na sa Department of Health (DOH).

Gibutyag ni Bise-mayor Eugene Clata nga angayang mangayo kini og public apology sa istasyon sa radyo ug sa social media sanglit wa’y balidong tinubdan kun asa niini gikan ang iyang gipadayag sa publiko.

Nanawagan sab ang opisyal sa mga netizens nga mahimong responsable sa ilang mga social media accounts ug di magpataka og sabwag og pekeng balita sanglit kalapasan kini sa balaod.

Matod ni Clata nga angayang seryosohon sa publiko ang kampanya batok sa Covid-19 ug motuman sa mga pahimagno sa kagamhanan. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph