MILAGDA og laing Executive Order No. 21 Series of 2020 si Digos City Mayor Josef Fortich Cagas diin nagdeklara nga temporaryong sirad-an ang mga establisyemento sa dakbayan samtang ginapahigayon ang community quarantine tungod sa hulga sa coronavirus disease (Covid-19) epektibo karong adlawa, Lunes, Marso 23, 2020.
Gipasabot sa maong direktiba nga apil sa sirad-an ang mga resorts, fitness centers, internet shops, gaming arcades, sports centers o clubs, billiard halls, basketball ug volleyball courts, videoke o karaoke bars, spa's, hair salons, barber shops, massage parlors ug mga dapit nga adunay kalingawan sama sa bars, pubs, gambling facilities nga ania sa dakbayan.
Giklaro sa kamandoan nga magpabiling abri ang mga ospital, klinika, botika, medical laboratories ug mga establisyemento nga nagahatag og health care services sa katawhan.
Abri gihapon ang mga supermarket, grocery stores, restaurants, fast food chains, convenience stores, 7/11 ug ubang establisyemento nga ang permit adunay 24/7 nga pagbaligya og mga pagkaon.
Apan luyo niini, hugot nga gimandoan ang mga nahibiling establisyemento nga mopatuman sa “No dine-in Policy” ug pulos “Take-out” ang ilang operasyon.
Abri sab ang mga gasolinahan, water refilling stations, hardware stores ug mga shops nga nagabaligya og mga essential household supplies materials ug uban pang mahinungdanong gamit sa panimalay.
Magpabilin gihapon ang serbisyo sa Davao del Sur Electric Cooperative, Digos City Water District ug mga buhatan sa telekomunikasyon.
Hinuon, si Cagas nagpahinumdom sa mga nahibiling establisyemento nga hugot motuman sa social distancing ug pag-disinfect sa ilang palibot sa tanang panahon. (Orlando B. Dinoy)