SUPERBALITA CEBU

Migallen: Tokyo Olympicsangay ikanselar

Taym pa

GIPANGKANSELAR, gipangsuspenso ug gipang-uswag ang mga dagkong events sa bisan asa nga nasod tungod niining nagkasaka nga pagkatap sa gikahadlokan nga coronavirus pandemic.

Lakip niini ang 2020 European football championships, ang mga kompetisyon sa national sports federation lakip na ang US track and field federation ug ang swimming federations sa America ug sa French.

Pero ambot og nganong hangtod ning mga gutloa nagmakuli pa man gihapon sa paghukom ang International Olympic Committee (IOC) sa pagdelatar na lang unta sa pagpahigayon sa 2020 Tokyo Olympics nga gikatakdang sugdan na karon Hulyo 24, 2020, upat ka buwan gikan karon.

Taliwala sa mga nagkalapad nga panawagan sa mga sports leaders sa nagkalainlaing nasod, sa gihapon si IOC President Thomas Bach pabilin mipahibawo nga ang opening ceremony mahinayon sa nahisgutang petsa.

Iyang gipasabot nga aduna pay igong panahon nga makontrolar pa ang pagkatap sa coronavirus ning sulod sa upat ka buwan.

Pero daghang mga qualifying events sa Olympics ang gipangkanselar na ug daghang nasod na usab ang nagduha-duha sa pagpadala sa ilang mga atleta.

Tiaw mo bay 57 porsiyento lang ka mga athletes ang naka-qualify, sigon sa natala sa record IOC record.

Si Toshiaki Endo, ang vice president sa Tokyo Games organizing committee, mipasabot nang daan nga ang organizing committee walay gahom sa pagdesisyon kalabot niini, kon dili iya kini sa IOC. Ang ila mao ra gyud ang pagpreparar.

Ang survey nga gihimo sa Kyodo News sa niaging semana, nagpakita nga 70% sa mga hapon ang nagtuo nga ma-delatar ug ma-postponed gyud ang Tokyo Olympics tungod sa coronavirus pandemic samtang 25% ang mipadayag nga mapadayon gyud.

Usa sa mga posibling rason kon nganong nagpadiki-diki kining IOC sa pag-postponed sa matag upat ka tuig nga sporting events, mao ang 5 million ka tickets sa Olympics nga nangahalin na ug laing 1.7 million sa paralympics.

Gibanabana nga mobalor og $83 million ang halin sa mga tickets ning duha ka events. Basin og dili sila gusto nga mo-refund niini.

Gawas niini, daghan nang nahan-ay nga mga dagkong sponsorships sa maong events ilabi na sa mga media outlet nga maoy opisyal nga mo-cover niini.

Nahadlok siguro sila nga mo-pull out ang mga advertisers ug magpa-refund kadtong mga nakapalit na sa ticket.

Nakasabot ta sa ilang baruganan, pero angay usab siguro nila tan-awon ug ikonsiderar ang risgo dili lang sa mga atleta kon dili sa tanang delegasyon ilabi na og di pa gyud mahatagan og solusyon kining pagkatap sa makalilisang nga virus nga mikalas na og libo-an ka kinabuhi sa tibuok kalibutan.

Makahuwat ra ang Olympics, pero dili ang pagrisgo sa kinabuhi sa tawo. (jun.migallen22@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph