GITUTOKAN sa Taiheiyo Cement Philippines, Inc. (TCPI) ang kinaiya sa mga kawani sa pagsaulog sa Safety Week karong tuiga uban sa tema nga, “Kinaiya nga Positibo, Maoy Mag-Iway sa Delikado, Aron ang Atong Pagpanarbaho, Himsog ug Sigurado!”
“Ang kinaiya adunay mahinungdanong bahin sa pagdala sa atong trabaho nga luwas ug epektibo,” mipahayag si Dwight P. Avila sa TCPI environment and safety department.
Samtang gihimug-atan niya ang panginahanglan alang sa malapad pa nga kausaban kabahin sa kaluwasan sa mga kawani.
“Unang gisugdan sa TCPI ang pagsaulog sa Safety Week upat na ka tuig ang milabay human si Seiichi Nakamura nahimong tagduma sa planta, ug human sa dakong linog nga may gikusgon nga 7.2 nga misentro sa Bohol pagka-Okkubre 2013 ug sa mahitabo paglabay sa makusog nga bagyong Yolanda sa Nobyembre sa samang tuig.
Buot sa kompanya nga himug-atan ang kaluwasan pinaagi sa kasaulogan bisan pa man nga daan na’ng tigpahigayon kini sa mga inisyatiba sama sa Safety Patrol, pagtamod sa Safety 24 Principle ug sa walay puas nga Safety Education.
Sa pagsa log ni’ng tuiga, naglakip ang mga kalihukan sa pamaayuhay sa safety slogan, safety puzzle, pagpangita’g mga mahinungdanong pulong, ug inigay sa pagsanta sa kayo diin mas daghan pa ang mga misalmot kay sa mga nangaging upat ka tuig, nakamatikod si Avila.
“Mas mahinungdanon kay mas taas karon ang tupong sa mga nakamaohan na karon sa mga kawani ug mga sakop sa mga tigsangkap,” siya miingon.
Mitagik sa midaug nga bansilag si Gaspar Merencillo, tagduma sa usa sa mga sanga sa Admin nga sa ingles mao ang: “Reinforce Positive Attitude to Ensure Safe and Healthy Work Place.” (PR)