SUGOD karon, Marso 23, 2020, magsugod na pag quarantine ang feed millers sa tanan nga mga plant-based raw materials gikan sa Luzon, Mindanao ug Rehiyon 8 nga isagol sa feeds alang sa mga baboy dinhi sa Sugbo.
Kini subay sa giluwatan nga kamandoan ni Gobernador Gwendolyn Garcia nga mao ang Executive Order (EO) No. 8 isip pag panagang sa pagkatap sa African Swine Fever (ASF) sa lalawigan sa Sugbo.
Sanglit 60 porsyento man nga mais ang gamiton sa pag himo og feeds ipaubos sa 20 ka adlaw nga quarantine ang maong materyales.
Apan gitugotan kini nga moubos pa ngadto sa 15 ka adlaw nga pag quarantine kon makapasalig ang mga millers sa paglukat sa sakto nga mga dokumento gikan sa Department of Agriculture (DA) sa rehiyon kon asa naggikan ang materyales.
Lakip na dinhi ang certification gikan sa Provincial Agriculture Office (PVO) pagpamatuod nga luwas sa ASF ang mga produkto.
Samtang ang uban nga raw materials sama sa soybean, feed wheat, peas og uban pa ipaubos lang kini sa 15 ka adlaw nga quarantine og kinahanglan usab nga mo kuha sa insakto nga dokumento.
Ang mga plant-based swine products, sagol sa feeds og laing raw materials nga gikan sa gawas sa nasud og katong mga imported mamahimo gihapon nga makasulod dinhi sa sugbo.
Apan kinahanglan nga mosubay usab kini sa mando pagpakita sa kompleto nga dokumento pagpamatuod nga ASF free ang mga produkto. (ANV)