NIANI og negatibong komento ang nag-trending nga post sa social media bahin sa kalapasan sa curfew sa Barangay Kamputhaw sa dakbayan sa Sugbo.
Si Barangay Kamputhaw Councilor Ramir Salonoy, kinsa usa sa miapas niadtong tungora kalabot na sa pagpatuman sa curfew, usa sa nakasaway sa gihimo sa maong kapitan.
Ang maong video nga kuha sa usa sa mga kauban ni Salonoy, kinsa madunggan sa video ang tingog sa usa ka lalaki nga medyo taas na ang pangidaron nga ulahing nahibaloan mao diay ang amahan sa Barangay Kalunasan nga si Nunilon Monares, kinsa dunay kaistorya sa selpon.
Sa pakighinabi ni Monares sa selpon, iyang gipasabot ang iyang kaistorya nga igo lang sila naglingaw sa birthday ug nihangyo kini nga dili lang mouban kay manguli na sila apan, dili mosugot ang mga pulis nga anaa sa palibot.
Si Salonoy nakasaksi sa taras ni Monares ug nakasaway sa nakita kay kadaghanan sa mga opisyal sa barangay na-busy sa pagtuman sa kamanduan nga gipakanaug ni Mayor Edgardo Labella, apan si si Monares nag-inom-inom lang.
Ang liquior ban gipatuman na usab ni Labella ug pagpatuman sa curfew lukop siyudad.
Giklaro usab ni Salonoy nga wala madala si Monares human nga kalit kini misulod sa balay ug wala makabantay ang mga pulis apan ang duha niini ka mga tawo mao ang gipangdala sa Presinto -2.
Si Salonoy mipadayag usab sa iyang habig nga sila igo lang siya mituman sa kamanduan sa mayor ug walay personalan nga gilantaw, kundi patas ang pagpatuman lang sa balaod nga maoy gitahas kaniya.
Way pasayluon
Si Police Colonel Hector Grijaldo, hepe sa Cebu City Police Office(CCPO), mipasalig nga wala silay ilhon bisan kinsa pa nga mga opisyal sa gobyerno nga nakalapas sa liquor ban human nag-viral ang usa ka kapitan sa dakbayan sa Sugbo ang naabtan sa kapulisan nga nag-inom gawas sa balay sa iyang uyab sa barangay Kamputhaw sa milabayng gabii.
Misuway pa sa pag-esplikar si Monares n nga naa ra sila gawas sa gate sa balay sa iyang uyab nag inom ug makita sa video ang mga ilimnong makahubog.
Tungod niini, si Grijaldo mohimo karon og imbestigasyon tungod kay wala pa siya makadawat sa report gikan sa police station nga mihimo sa pag dakop sa maong kapitan dungan sa pasalig nga dili sila mopatawad bisan pa man kung kini usa ka barangay official.
“All of us is under the law. Anyone of us who violates must be answerable,” matod ni Grijaldo.
Nasagmuyo si Grijaldo nga unta ang mga opisyal sa barangay ang mangunay sa kamandoan ni Mayor Labella ilabi na karon nga naa sa krisis ang tibuok nasud tungod sa gikahadlokan nga virus.
Sila unta matod pa ang ehemplo sa barangay aron sundon sila sa ilang mga konstitwente apan sila na hinuon ang nanguna sa pag supak sa balaod nga gipatuman sa gobyerno.
“The government officials should be the one role model natin. Sila yung magpapakita nung tamang pagsunod sa batas natin,” matod niya.
Mahimo nga makainom sa sulod sa ilang balay apan kung naa na kini sa gawas sa gate usa na kini ka public place nga mahimo nang dakpon tungod sa curfew nga gipatuman sa kagamhanan.
Apan ilang subayon kung asa nakapalit sa ilimnong makahubog si Monares tungod kay walay gitugotan nga mga tindahan sa pag baligya niini.
Si konsehal Salonoy nagkanayon nga matag gabii na sila nag-roving sa tibuok Barangay Kamputhaw human gipatuman ang estriktong curfew ug liquor ban.
Ang dapit nga giimnan ni Monares naila na nga daghan ang mag-inom nga maoy hinungdan nga ilang gituyo ang pag-adto uban ang kapulisan.
Sa ilang pag-abot naabtan nila ang kapitan nga nag-inom uban sa iyang mga kauban.
Kasong kriminal ang atubangon ni Monares ug laing kasong administratiba ang ipasaka ngadto sa korte. Subayon pa usab unsay kalapasan nga nahimo sa mga pulis nganong wala kini ma-blotter ug wala matod pa dakpa ang kapulisan taliwala sa kalapasan nga nahimo niini. (BBT, AYB)