MAS gipahugtan ang pagpatuman sa social distancing, gidid-an na ni Gobernador Gwendolyn Garcia ang pagkaon sa sulod sa fastfood chains, restaurants ug ubang kan-anan sama sa mga karenderya nga nahisakop sa lalawigan sa Sugbo.
Kini maoy gipahibalo ni Garcia atol sa pakighinabi sa mga tigbalita gahapon, Marso 23, 2020.
Ang maong lakang gibuhat aron malikayan ang pagkatap sa coronavirus disease (Covid-19) ilabi na kon magpundok.
Palig-unon kini pinaagi sa usa ka executive order nga mo epekto 24 oras gikan sa pag issue niini.
Subay sa maong balita, ipasusi ni Garcia ang usa ka kan-anan human nasakpan pinaagi sa taho gikan sa usa ka netizen nga si Lindo Gigante.
Ang kan-anan nga anaa nahimutang sa lungsod sa Danao, giingong nipahigayon og party taliwa sa kamandoan sa mga kadagkoan nga gidid-an ang pagpahigayon og pundok tungod sa kahadlok sa Covid-19.
“Mcdonalds Danao, di man mo patuo? Unsa naman nang inyo? Kahakog na man lang gyud ninyo ug negosyo. Kwarta naman lang gihapon na inyong gihunahuna karong panahona nga namiligro na ang kinabuhi sa mga Sugboanon. Sobra na kaayo inyong kahakog,” matod ni Garcia.
Sa Marso 21, 2020 miluwat og Executive Order No. 5-K si Garcia nga naglatid mahitungod sa mga protocol nga angay subayon sa mga Sugboanon aron nga malikay kini sa pagkatap sa covid.
Ang mga karenderya sa lalawigan sa Sugbo gihatagan ug 48 oras o duha ka adlaw nga makapangandam sa maong mando.
Inay mag dine-in o mo kaon sa sulod sa kan-anan, kinahanglan nga ipa-deliver na lang o ba kaha temporaryo nga manira una aron nga ma menosan ang contact sa mga tawo.
“Ang tanan fastfood chains, McDonald, Jollibee, ang tanan pizza parlors kining tanan dili na tugtan ang dine-in. Dili na pwede nga adto mosulod kay mokaon. Ang tugtan nalang home deliveries or drive thru. Tagaan usab nato alang sa mga karenderya ug kan-anan in the next 48 hours aron makapangandam mo didto sa mga kalungsoran didto sa atong probinsya,” matod ni Garcia.
Sa laing bahin, subling mipahinumdom si Garcia labot sa mga kompanya o grupo nga padayon nga misuway sa iyang mando paghunong una sa tapok o outing tungod sa posible nga pagkatap sa Covid-19.
Pipila ka mga hulagway sa mga langyaw og Sugboanon nga nangaligo, nag-outing ug misuway sa kamandoan sa lalawigan.
Usa sa mga kompanya dinhi sa Sugbo ang giingong mipahigayon ug teambuilding sa usa ka resort sa Boljoon.
“Di ba niingon naman ko nga wala na lagi mga outing? Di ba niingon nako ana? Ang Big John trading ni. Unsa man mo, mga bungol? Di man mo patuo! Kinsa may tag-iya aning Big John trading? Kinsa may nagpasiugda niini?” matod ni Garcia.
Tungod niini giabisohan ni Garcia ang maong resort ug ang ubang mga resort owners nga mosupak sa balaod, i-revoke ang business permit ug pugngan na sa pagbakwi niini.
Giabisohan usab niya ang tanan nga mga mayor ug barangay officials nga ipatuman ang kamandoan kauban ang sakop sa kapulisan og militar sa lugar.