NAGHUWAT ko karon kanus-a moanunsyo ang Department of Health (DOH) kabahin sa resulta sa confirmatory test sa duha ka doktor nga na-ICU sa usa ka pribadong hospital dinhi sa Syudad sa Sugbo.
Ni-chat man gud kanako ang usa ka higala nga nahimong pasyente sa bana sa maong doktor kay nabalaka. Ako siyang giingnan nga maghulat lang kita sa anunsyo sa kadagkuan sa DOH. Wa pa koy na-monitor karong nagsulat ko niining lindog.
Magtiayon kining duha ug kuno natakdan kay nanambong sa usa ka kasal karong bag-o. Usa ka bisita gikan sa kaulohan ug nakabyahi sab sa gawas sa nasud kay usa sa mga nitambong.
Nihangyo og mga panalangin ang mga paryente sa maong mga doktor.
Tingale kay bag-o pa naabot ang mga Covid test kits dinhi sa Sugbo, wa pay na-monitor nga mga positibo bisan pa man sa mga hungihong nga lanog na kaayo.
Ang ako lang kay preparado ba kaha ang health care system sa Sugbo nga moatiman unya inig sulbong sa mga kaso. Di man gyud makumkom ang mga impormasyon nga sama ingon niini.
Alang kanako, kining gubat batok sa Covid 19 kay usa ka medical battle. Kining mga curfew ug quarantine dili man butang nga politikanhon o sa polis o sa mga militar. Angayang lider niini mao ang atong mga eksperto sa panglawas.
LGU
Bisan pa man, daghan ang mga butang nga gikinahanglan ang mga LGU leader sama kang Gob. Gwen Garcia kay sila man ang dunay mandato.
Ang mga LGU heads man ang makamando og curfew. Di lang unta mag-alig-alig ang di elected kay mamumo man lagi. Bisan gamay nga butang, matod pa sa usa ka kauban namo sa Sun.Star, ang kaulaw na lang kay nagpatakag himog mando.
Fake News
Magbantay kita karon sa atong mga isulat ug mga komentaryo sa Facebook kay daghan ra kaayo ang mga opisyal nga masuko hisgutan ang ilang sayop.
Mao nga ako mismo maghulat og opisyal nga anunsyo sa DOH o sa unsang local nga kagamhanan.
Moawhag lang sab ko sa atong mga higala nga tig-andam sa mga anunsyo sa mga opisyal nga magbantay nga di magpasagad. Kon manakop kita og mga nagsabwag og fake news, di sab tingale duhigon nato ang atong bosing sa atong kahanggaw.
Ang mahinungdanon karon mao ang panaghiusa sa atong gubat batok sa coronavirus disease kon Covid. (@anol_cebu sa Twitter)