BADLONGON. Ang pakigbatok aning corona virus (Covid19) usa ka hagit sa tanan katawhan sa pagtuman sa mando ug sa mga lagda sa Department of Health (DOH) ingon man sa mando sa atong kagamhanan sa pagpuyo sa atong tagsa-tagsa ka panimalay aron mapugngan ang pagkatap niini.
Ang Covid19 usa ka salot nga dunay ngalan apan walay nawong. Di moila og adunahan o pobre, professional o dili. Gani, ang mga doctor nga anaa sa atubangan aning gubat batok sa Covid19 sila intawon ang naigo sa virus, nga ang kadaghanan kanila namatay na. May their souls rest in eternal peace with our Creator!
Ang paglakaw wala gidili apan dunay mga kondiyones nga sundon sama lang sa pagpamalit sa pagkaon ug tambal ug kadtong moadto sa hospital aron magpatambal. Gani, ang supermarket, tindahan ug botika wa gisira tungod sa panginahanglan sa katawhan.
Dili sa pagpasigarbo apan duolan na og duha ka semana wa ko motungha sa “Frankahay Ta” ang radio program namong Atty. Frank Malilong ug Titus Borromeo sa dyCM (1152AM) aron pagtuman sa mando sa DOH ug sa atong kagamhanan. Pipila ra kaha ang moingon nga di mahadlok mamatay sa sakit bisan og nakahibawo na ta nga ang kinabuhi dunay katapusan?
Naay gyuy mga gahi og ulo. Ila ba kaha gipakita nga sila himsog o ang ila ba nga pagkahambugero? Hinuon, dunay mga tawo nga ang kalisud maoy gigamit nga rason sama sa mga drayber sa trisikad, tricycle, habal-habal ug PUJ. Tingale, alang kanila mas bale mamatay sa Covid19 kay sa mamatay sa gutom. Susmaryosep!
Hinuon, dili usab nato mabasol kadtong mga naglisod nga naningkamot nga makasustenir ug mabuhi bisan sa atubangan ni kamatayan nga ginganlan og Covid19. Unta, mao ni ang hut-ong sa atong komunidad nga hatagan og pagtagad sa atong kagamhanan sa pagpatoman community quarantine.
Daghan ang nangutana kon asa na ang gisaad nga hinabang sama sa bugas ug uban pa gikan sa kagamhanan nga lokal ug nasyonal alang sa mga kabus. Naa ba gyud hinabang alang sa mga kabus ug kadtong di na makatrabaho tungod sa lockdown?
Sa lain bahin, daghan, labina ang pundok sa mga doctor, ang wa mahimuot sa gibuhat sa uban nga mga pulitiko, lakip ang ilang staff, nga didto sa ilang balay nagpatesting gamit ang test kit bisan sa kanihit niini ug mas gikinahanglan sa duna nay balatian kon persons under investigation (PUI) o persons under monitoring (PUM).
Di lang ko mohingan bisan og migawas na ilang ngan sa social media. Kini sila nagpabaga lang sa nawong ug wa makabasa sa ehemplo nga gipakita ni Canadian Prime Minister Justin Trudeau, nga bisan og positibo iyang asawa sa Covid19, wa siya mogamit sa test kit kay iyang gipalabi ang katawhan nga nagkinahanglan niini.
Wa ta moingon nga dili angayan magpatesting sa virus ang mga pulitiko kay pareha ra man ta tawo. Apan dunay mas nagkinahanglan kay kanila. Ang mga doctor nga naa sa frontline, gani nataptan ug napatay sila, apan wala mopahimus sa test kit kay ilang gipalabi ang duna nay sintomas sa Covid19.