SIKOP sa hiniusang pwersa sa kapulisan ang upat ka mga indibidwal nga giingong nag overprice sa mga alcohol ug nasapon sa entrapment operation diha sa JT Food Depot, Justo Ramonal St. Barangay 33, Cagayan de Oro.
Milusad og operasyon ang operatiba sa Criminal Investigation and Detection Group-RFU Northern Mindanao uban ang mga operatiba sa Police Station 2 sa Cogon.
Kini adunay koordinasyon sa Foods and Drug Administration ning siyudad batok niining upat ka gitumbok nga mga mamaligyaay.
Giilang sila si Percy Datoy, 24, minyo, taga Zone 10, Upper Carmen, Cagayan de Oro City; Yobryte A. Unabia, 37, taga Zone 8, Carmen, Cagayan de Oro City; Jerome P. Quiachon, 32, taga Tibasak, Brgy Macasandig; ug Daniel C. Casiño Jr. 22, taga Purok 1A, Tablon, ning siyudad.
Sa imbestigasyon nasuta nga kining upat napalitan sa pulis nagpatoung buyer og overpriced nga mga alcohol nga gipatungan og 10 porsiyento sa orihinal niini nga presyo sa 90 percent ethyl alcohol nga adunay market value nga P23,900.
Nakumpiska sa ilang posisyon ang 96 plastic containers nga adunay 150ml sa 90 percent ethyl alcohol; 111 plastic containers nga adunay 100ml ethyl alcohol matag usa; 73 plastic containers nga dunay 50ml ethyl alcohol matag usa ug usa ka dusted P100 bill; 17 ka boodle money (P1,000 matag usa);9 ka boodle money nga tag P100 each ug usa ka pad official receipt ug usa ka business permit.
Kasong kasupakan sa Section 11 sa RA No. 9711, Sec 5 sa RA 7581 nga giamendar sa RA No. 10623 ug FDA Circular 2020-05 (Prohibition on the Online Selling of Essential Emergency Medical Supplies Beyond the Prices Ceiling /Range set by the Department Memorandum No.2020-0058 and Department Memorandum No. 202-0058-A ang gitakdang atubangon sa mga dinakpan nga detinado na sa prisuhan karon panahona.