GISIGURO sa Cagayan de Oro City Police Office (Cocpo) nga luwas usab ang mga sakop sa kapulisan nga maoy mamahimong frontliners kalabot na sa pagbatok sa coronavirus disease (Covid-19).
Gibutyag ni Police Colonel Henry Dampal, city director sa Cocpo, nga dunay gipahigayon nga training sa kapulisan ug nagpadala og mga partisipante diin sagad niini mga nurse.
“Nagpadala ta didto og atong contingents ma train sila no, most likely they’re nurses, mga nurse nato and then naa ta’y gihimo pud nga orientation and training sa mga personnel nga atong nakita nga mao po’y mo enforce,” matud ni Dampal.
Gidugang pa nga matag police station sa dakbayan duna kini mga gipangdesignar nga kapulisan alang niini.
“Every station naa man tay gi identify initially grabe man gud ni siya ka delekado, we cannot just simply send somebody nga bisan kinsa nilang so kailangan nga they must be equipped with the adequate proper trainings and orientation para nga dili pud ma butang ang ila nga kinabuhi sa alanganin,” dugang ni Dampal.
Gidugang pa nga atol sa orientation duna’y mga personahe usab sa task force oro nga niapil niini aron usab makatabang sa mga pagpatuman sa mga gabayan ug kamandoan sa lokal nga kagamhanan sa pakigbatok niining virus.