GIKAHADLOKAN sa niaging mga panahon ang tawo nga nagmaskara. Isipon nato nga hold-apir, kawatan o may gitago ang maong tawo.
Ang mga tawo nga may sakit nga tuberculosis ug ubang sakit sa baga kinahanglang magmaskara sab. Tungod sa CCTV (closed-circuit television) nga gipangmontar sa mga establisyemento o dalan sa palibot, nagmaskara sab ang mga bunguton nga gustong mohimo og milagro.
Ang mga gika-intapan nga “riding-in-tandem” nga tigpamusil sa mga salawayon sa katilingban nagmaskara sab o kaha nag-helmet aron dili mailhan sa awtoridad.
Kaniadto ginagamit lang ang maskara sa “Halloween party” sa eskwelahan og sa sosyal nga okasyon aron dili masakpan ang mga maluibon. Panghadlok sab kini sa mga bata nga latagaw og aron mosayo og pagkatulog.
Ginagamit sab ang maskara sa mga “superhero” sa pelikula aron madugangan ang ilang pagkamisteryuso ug pagkagamhanan. Gigamit kini aron itakuban ang tinuod nilang pagkatawo.
Apan karon lahi na ang panahon. Ang tanang tawo gimandoan nga mosul-ob og maskara dili aron ipanghadlok o itago ang kaugalingon kon dili aron makalikay nga makatakod o matakdan sa kahibulongang sakit nga coronavirus disease (Covid-19).
Daghan na kaayo ang natakdan og nangamatay sa tibuok kalibutan busa gitawag na kini sa World Health Organization (WHO) nga sakit pangkalibutanon o pandemic proportion.
Gawas sa China, grabe ang epekto niini sa nasud sa Italy diin sobra 600 ka tawo ang namatay sud sa usa lang ka adlaw, 30 niini mga pari. Kahibalo kita nga ang Italy gidugokan kaayo sa daghang turista ilabi na sa Vatican, sa Roma nga maoy sentro sa Katolisismo sa kalibutan.
Dugay sab kaayo sila nagdeklara og lockdown busa grabeng pagkuyanap sa Covid-19. Dinhi sa atoa nagpaguwa og daghang kasuguan si Davao City Mayor Sara Duterte-Carpio nga maoy napiling hepe sa Regional Anti Covid-19 Task Force.
Usa niini ang Executive Order No. 10 niadtong Marso 15 nga nagdasig sa tanan gawas sa mga health service providers sa pagpabilin sa ilang mga panimalay. Gisuspende niini ang tanang tapuk-tapok, gikan sa eskwela hangtod sa pagsimba sa mga relihiyusong grupo.
Iseguro sab nga dili magdug-ol o may “social-distancing” ang pasahero sa sakyanang pampubliko o sa pagsulod sa mga malls. Bisan dili kinahanglang sirad-an ang mga establisyemento, kinahanglang maghimo kini’g “flexible time plan” sa ilang mga empleyado.
Kadtong gikan sa gawas sa Davao, ilabi na didto sa kaulohan o sa gawas sa nasud mahimo nang mga Person Under Monitoring (PUM) ug kadtong may sintomas tawagon og Patients Under Investigation (PUI).
Ipahigayon sab ang 14-21 ka adlaw nga kurintinas. Di na luwas ang Davao tungod kay naa nay positibong biktima dinhi, ang katapusan kay ang gibalitang duha nga taga Buhangin ning syudad.
Gipakanaug na usab ang curfew hours gikan sa alas 9:00 sa gabii hangtod sa alas 5:00 sa buntag. Karong semanaha posibleng imando na nga magsul-ob og maskara ang tanan. Posible sab nga mas estrikto ang pagsulod, gawas sa mga barangay.
Ang uban kanila naghimo na og passes slip sa mga trabahante nga motrabaho sa siyudad matag adlaw. Unta mag-ampo ug mosunod kita sa mando sa awtoridad ug mo-agwanta una sa maskara ug walay lakwatsa.