BANSALAN, Davao del Sur -- Nagpagula og bag-ong direktiba si Mayor Quirina Sarte diin nagklaro nga dili na mahimong makasulod sa mga pampublikong lugar ang mga wa magsul-ob og face mask.
Gipakatag na sab ang mga checkpoint sa 25 ka mga barangay ug gimandoan ni Sarte ang publiko nga motuman sa curfew hours gikan alas 8 sa gabii hangtud alas 5 sa mosunod nga buntag.
Adunay mga opisyal ug tanod sa barangay ang nagbantay sa mga entradang bahin sa ilang dapit.
Kini aron pag-seguro nga wa’y makalusot nga indibidwal nga di moagi sa kwarentinas.
Aduna sab giandam nga mga alcohol ug sanitizer alang sa tanang mosulod sa ilang lugar.
Sa silingang lungsod sa Magsaysay, hugot sab ang gihimong checkpoint sa kapolisan diin gidili ang pag-angkas sa mga motorsiklo.
Si Major Jeffmar Tercero, hepe sa kapolisan, nagbutyag nga gawas sa pagsul-ob og face mask, kinahanglan nga adunay kumpletong dokumento ang tanang drayber ug ilang sakyanan. (Orlando B. Dinoy)