NINDOT unta paminawon ang mga taho nga ang usa ka probinsiya negative sa Covid-19.
Mora’g malipay ta maminaw kay sama sa luwas pa ta nga magtikaw-tikaw sa kadalanan.
Apan subo paminawon kay dunay rason ngano nga negative ang usa ka probinsiya sa Covid-19.
Negative kay wala may test kits.
Pasabot, dili pa mahibaw-an kon unsa gyod ang tinuod nga sitwasyon sa maong lugar kay wala may instrumento alang sa pagtino niini.
Dili pa segurado nga walay Covid-19 case sa maong lugar.
Anha lang mahibaw-an kon duna nay mga test kits unya mogawas na ang resulta sa mga sampol nga gitestingan.
Bisan kon ibalita nga negative sa Covid-19, dili pa diay kita angay nga maghudyaka.
•••
Dunay miabot nga mga test kits. Apan gamay lang ang gidaghanon niini.
Kulang lang kini sa lalawigan sa Sugbo. Samot nga kulang kini alang sa panginahanglan sa tibuok rehiyon 7.
Sa kakulang sa gidaghanon, angay nga maayohon kini sa pag-gamit.
Apan dunay pangutana.
Kinsa man ang angayan nga makapahimulos sa mga test kits, ang persons under investigation (PUIs) ug persons under monitoring (PUMs) ba o ang mga politiko o adunahan nga mga tawo?
Nganong nakapangutana man ako niini?
Tungod sa balita nga akong nadawat nga bisan gani kadtong walay mga symptoms, nagpa-test gyod para lang maseguro nga negative gyod siya sa Covid-19.
Walay makaangal kay “dako” man og tingog ang opisyal, matod pa sa akong amigo.
Padak-anay lang ba diay og ulo ning test kits?
•••
Lisod ang pamasahero karon.
Gidid-an ang mga depasahero nga mokarga sa regular nga gidaghanon kay gimando ang pagsunod sa gitawag og 'physical distancing' nga tag-usa ka metro ang gilay-on sa matag pasahero.
Kon 14 ang regular nga kargada, karon ang gitugotan kay katunga na lang.
Alkanse kaayo kini kon regular lang ang pletehan og wala sab mo-os-os ang presyo sa krudo.
Unsaon man lang ang abangan sa sakyanan, apil na ang para sa pagkaon ug ubang panginahanglan sa pamilya?
•••
Duna akoy suhestiyon.
Kon lisod ang pamasahero, mosuway kuno ta sa kargamento.
Suwayan nato pagpakigsabot ang atong mga silingan nga kita na lang ang mangompra alang kanila sa ilang panginahanglanon sa merkado.
Siyempre, dunay “patong” kini alang sa kahago sa drayber og kon daghan ang masabot nga mga silingan, mahimo na nga dili na lang kita mamasahero, mopakyaw na lang kita sa kargamento.
Dako kining tabang sa kwarantinas nga gipadagan karon kay ma-limitahan na man ang gidaghanon sa mogawas ug magtikawtikaw sa karsada.
Dako sab kining tabang sa mga silingan sanglit dili na man sila maghago pa og pangompra sa merkado.
•••
Bisan pa sa gipadagan nga curfew, lisod sabton kining ubang tawo.
Imbes adto magpuyo sa ilang balay, adto na man hinuon magyampungad sa gawas og mag-inom sa mga barkada.
Inig kadungog sa sirena sa mga police patrol car, isig tago unya inig labay, balik na sab sa ilang inom. Mangatawa pa nga morag mga bata nga perteng himuota.
Sama sa gidula-dulaan lang nila ang pahimangno nga mag-kwarantinas aron dili mosamot ang problema sa Covid-19 sa atong nasod.
Daw sa gibale-wala lang nila ang kakuyaw nga gidulot sa maong sakit.
Mao kini ang hinungdan ngano nga maglisod gyod pagsagang ang gobierno sa Covid-19.
Kon unsa kagahi ang ulo sa ubang mga tawo, mao sab ang kagahi sa problema sa pagsulbad sa Covid-19.