TULO ka resolution ang gikatakdang tuki-on sa konseho sa dakbayan sa Lapu-Lapu sa padayong pakigbatok sa coronavirus disease COVID-19 karong umaabot Huwebes, Marso 26.
Kini mao ang paghatag ug hazard pay sa mga medical personnel sa dakbayan sama sa city health workers, sa mga frontliners sama sa pulis ug fire personnel ug mga first responder sama sa City Disaster Risk Reduction and Management Office CDRRMO.
Gibuwag ang resolution ni Konsehal Rico Amores. Matod ni Amores nga importante ang paghatag ug hazard pay niining mga nag-unang personnel sa pagbatok sa maong sakit.
Kini human nga aduna nay mga doktor sa kaulohan ang giingong namatay sa naasoyng sakit gumikan sa kanunay pag atiman sa mga pasyenteng mataptan sa Covid-19.
Ubos sa resolution nga giandam ni Amores gikatakdang makadawat og P10,000 nga hazard pay ang mga medical personnel sa kagamhanan sa dakbayan. Samtang P5,000 usab ang sa kapulisan, fire personnel ug mga sakop sa CDDRMO gumikan kay dili sila sama sa mga medical personnel nga direkta gayud nga moatiman sa mga adunay sakit.
Sa naasoyng kantidad mahimo na kining magamit sa mga personnel aron makapalit og mga vitamins ug uban pang panagang sa nahgisgutang sakit sa ilang inadlaw-adlawng pagserbisyo.
Ang mga kantidad hinuon mahimo pang mausab depende unya sa mauyonan sa konseho ug ingon man ni Lapu-Lapu City Mayor Junard “Ahong” Chan.
Kung maaprobahan sa konseho nalatid sa resolution ni Amores mao nga mahimo kining mapahimuslan sa mga personnel gikan pa niadtong Marso 17 kun retroactive.
Giklaro usab ni Amores nga base sa iyang gipanday nga resolution mahimong makadawat ang mga personnel sa hazard pay kada buwan hangtod nga aduna pa ang hulga sa COVID-19.
“Sponsor lang ni atoa kay imagine nimo daghang doktor nga ganahan na kuno na mo-resign ug ni-resign kay nakuyawan,” pagpasabot ni Amores. (GCM)