MOABOT ngadto sa P72 million nga balor sa illegal drugs ang nasakmit sa kapulisan sa Central Visayas sulod sa 23 ka adlaw sa ilang sunod-sunod nga anti drug operation lukop sa Rehiyon 7.
Gikan Marso 1 hangtod sa Marso 23 nakapahigayon sila og 504 ka police operations nga niresulta sa pagkasakmit sa 790 ka drug personalities. Upat ang nakalas human kini misukol sa kapulisan.
Nakakuha sila og 9.9 kilos sa gituohang shabu nga mo kantidad sa P67,709,368.00 ug 36.421 kilos sa pinaugang marijuana nga adunay balor nga P4,370,608.
Matod ni Police Brigadier General Albert Ignatius Ferro, hepe sa Police Regional Office 7, nga bisan sa busy na nila sa pagpatuman sa general home quarantine diin halos tanang personnel sa kapulisan naa na sa gawas aron mopatuman sa curfew ug checkpoint wala nila pasagdi ang kampanya batok sa illegal drugs.
“Amidst the Covid19 crisis in the country, Police Regional Office 7 is committed and serious in its anti-criminality efforts to deliver a strong message for those who are still engaged on illegal activities that they have no place in the region,” matod ni General Ferro.
Sa kinatibuk-an ang labing daghan nga nasakmit mao ang Cebu City Police Office diin nakakuha sila og 5.5 kilos sa gituohang shabu nga mokantidad ang tanan sa P38,060,348 ug nakasikop silag 174 ka drug personalities sa 128 ka anti drug operations.
Gisundan kini sa Cebu Provincial Police Office nga adunay 3.3 kilos nga gituohang shabu nga mobalor sa P22,491,621 ug P4,341,148 nga kantidad sa Marijuana.
Magpadayon pa ang ilang mga anti-drug operation sa kabarangayan bisan sa gihimong general home quarantine checkpoint ug curfew aron mapugngan ang pagkuyanap sa illegal nga drugas nga naa ra sa panimay ang mga tawo. (AYB)