TACLOBAN City--Gikompirmar sa Department of Health (DOH) sa Eastern Visayas o Region 8 nga usa ka pasyente ang nagpositibo sa coronavirus disease (Covid-19) sa rehiyon.
Matod sa DOH, gikan sa lalawigan sa Northern Samar ang 51 anyos nga babayeng pasyente.
Nahimo nga Person Under Investigation (PUI) ang pasyente nga dunay travel history sa nasud sa Japan ug naabot sa Pilipinas niadtong January 2 ug nipuyo pa sa Manila.
Naabot kini sa Northern Samar niadtong Marso 3, 2020.
Ang pasyente nagpakunsulta pa sa pribadong tambalanan niadtong Marso 7 gumikan kay naglisud og ginhawa ug dunay sip-on ug ubo.
Gi-admit sa intensive care unit (ICU) sa referral hospital ang pasyente niadtong Marso 12.
Sa iyang pagka-admit, miarang-arang ang kondisyon sa pasyente ug duna nalang panagsa nag ubo niini ug gikatakda unta nga igawas.
Nakurat ang mga doktor sa dihang nigawas sa samang adlaw ang resulta gikan sa Research Institute of Tropical Medicine (RITM) nga positibo kini sa Covid-19. Nag deploy na og team ang DOH-8 alang sa pagahimuon nga contact tracing.
Matod sa DOH-8, nag improbar na hinuon ang kondisyon sa pasyente ug naa na sa recovery stage.
“With this evolving situation. I assure the public that the DOH-EV CHD is on top of the situation. With the laboratory result of the first confirmed case we are able to manage the patient who has greatly improved and is now recovering” matod ni DOH-8 Director, Dr. Minerva Molon.
Adlaw nga Lunes, Marso 23, 2020, ang DOH-8 dunay naitala nga 237 ka PUI; 1 sa Biliran; 2 sa Borongan City; 34 sa Calbayog City; 40 sa Eastern Samar; 19 sa Leyte; 10 sa Maasin City; 59 sa Northern Samar; 4 sa Ormoc City; 42 sa Samar; 15 sa Southern Leyte; 10 sa Tacloban City; 1 sa Baybay City.
Pabilin nga naka-admit sa tambalanan ang 15 ka PUI, 31 ang na-discharged apan gipaubos sa strikto nga monitoring ug ang uban naka home quarantine.
Nanawagan ang DOH-8 sa publiko nga ipatuman gyod ang physical distancing, saktong paglimpyo sa lawas ug palibot ug saktong pag ubo.
Gihangyo usab sa DOH-8 ang katawhan nga dili i-discriminate o bugal bugalan ang mga PUI ug PUM ug ilang pamilya. (JKDP)