PAMILYA man o dili, dakpon na sa Land Transportation Office (LTO) 7 kon moangkas sa bisan unsa nga motorsiklo subay sa gipatuman karon nga guidelines sa Department of Transportation (DOTr) sa social distancing.
Nabali na sab ang gipatuman sa LTO 7 human gibalik nila kini nga mando sa DOTr.
Usa ka semana ang nakalabay dihang gitugotan sa LTO 7 ang backride o angkas sa family members human magkaestorya sila si LTO 7 Regional Director Victor Caindec ug Presidential Assistant for the Visayas Secretary Michael Lloyd Dino.
Apan si Caindec nibutyag nga gitawagan siya sa duha ka assistant secretaries ug usa ka undersecretary sa DOTr kabahin sa pag-overide sa gipagawas nga guidelines.
Unang gipasabot ni Caindec nga tungod sa kadaghan sa habal-habal sa Sugbo, usa unta sa iyang tagaan og chance kining mga habal-habal human gipahunong sa technical working group ang operasyon sa motorcycle taxis susama sa Angkas ug Joyride.
“Multiple bookings for a single trip provided by the Transport Network Vehicle Service (TNVS) and the pilot implementation of Motorcycle Taxi shall be suspended/prohibited,” tipik sa guidelines sa DOTr sa social distancing.
Apan tuod man, ang mando sa DOTr alang diay sa tanan.
Dugang ni Caindec nga nipatuman lang sila sa mando, apan di kini permanente.
Temporaryo sila nga manakop isip pamaagi sa pagprotehir sa publiko batok Covid-19.
Isyuhan og Temporary Operator’s Permit (TOP) ang tanang driver sa motorsiklo nga magpaangkas ingon man pamultahan og P5,000 isip kalapasan sa balaod.
Hinuon, giklaro ni Caindec nga di nila i-impound ang motorsiklo ug ila ra nga isyuhan og TOP.
Apan kuhaon ang lisensiya ug nipahimangno si Caindec nga sirado ang LTO ug lisod ang pagkuhag balik sa masakmit nga lisenya.
Subay sa social distancing, niabot na sa 77 ka drivers ang nahatagan og Inspection Report Summons (IRS) sa Land Transportation Franchising and Regulatory Board (LTFRB) 7.
Matod ni LTFRB 7 Regional Director Eduardo Montealto Jr., nga gawas sa social distancing, aduna sab sila’y nadakpan nga lima ka UV Express human kini nag-overcharging ug usa ka public utility bus nga nag overloading subay sa social distancing.
Libreng parking
Gimandoan ni Cebu City Mayor Edgardo Labella ang Cebu City Transportation Office (CCTO) nga hunongon usa ang pagpangayo og bayad sa tanang mo-park sa mga dan sa Dakbayan sa Sugbo nga gitagana alang sa pay parking sa tibuok gidugayon sa general community quarantine.
Kini nalatid sa iyang giisyu nga Executive Order No. 063.
Lakip niini ang temporaryo nga paghunong sa pagpabayad sa mga medical ug health workers sa tanan mga pay-parking nga gi-operate sa Cebu City Government.
Ang EO gibuhat alang sa pagsuporta sa tanang frontliners sa medico legal.
Ang giilang medical ug health personnel gilangkuban sa mga empleyado sa Department of Health (DOH), mga ospital sa DOH, mga ospital sa local government units ug Cebu City Health Department; pribado nga mga trabahante nga di limitado sa propesyonal nga medikal legal, mga hospital administrative staff ug ang mga luyo-luyo sa mga pribadong pasilidad ingon man ang service providers; ug health workers ug volunteers sa Philippine Red Cross ug World Health Organization.