GIPABUHAGAY ni eight-division world champion Manny Pacquiao nga buhaton niya ang tanan niyang makaya aron matabangan ang wala’y pildeng si Mark “Magnifico” Magsayo nga mahimong world champion.
Ang 24 anyos nga boksidor, kinsa adunay 20-0, 14KOs nga rekord, bag-uhay lang mipirma og kontrata sa MP Promotions nga gipanag-iya sa Pambansang Kamao ng Pilipinas.
Sa iyang pagkahisakop sa MP Promotions, dagkong mga oportunidad ang naghuwat kang Magsayo.
“We have been watching Mark for a few years now, bounced around and his career was put on hold for various reasons. But he is home now with MP Promotions and we are thrilled for Mark and his wife Frances that they signed with us,” matod ni MPP president Sean Gibbons sa interbyu sa ibtimes.com.
Ang MPP nakig-abag sa Premier Boxing Champions (PBC) alang sa pagdumala sa boxing career ni Magsayo, kinsa lumad nga taga Tacloban City, Leyte apan kasamtangang nagpuyo sa Pasig City, Manila.
Sa inisyal nga plano sa MPP ug PBC, ilahang paawayon si Magsayo karong Mayo 16, 2020 sa Amerika apan nagdepende pa kini sa sitwasyon sa kalibutan nga gihudlat sa coronavirus disease (Covid-19).
Sulod na sab sa duha ka mga higayon nga nakapakita og aksyon si Magsayo sa Amerika.
Sa labing una niyang away, mirehistro siya og impresibong 1st round knockout nga kadaugan batok kang Yardley Cruz niadtong Oktubre, 2015.
Iya kining gisundan og 12-round decision nga kadaugan batok kang Ramiro Robles niadtong Septiyembre, 2016.
Taliwala sa iyang maayong rekord, wala gihapon nakasulbong ang karera ni Magsayo gumikan kay wala siya mahatagi og dagkong mga away sa ninglabay’ng pipila ka mga tuig.
Gani sa tibuok 2018, wala nakaaway si Magasayo hinuon nakabawi siya niini pinaagi sa duha ka mga away nga iyang nasagubang niadtong 2019.
Ning panahuna, mga unom na sab ka semana nga wala nakaaway si Magsayo apan gilauman nga mausab ang dagan sa iyang karera karon nga nahimo na siyang sakop sa MPP.
Matod ni Magsayo nga mas interesado siyang moaway ning higayuna hilabi na kay gidumala siya sa iyang idolong boksidor sukad pa kaniadto.
Gipasabot ni Magsayo nga si Pacquiao ang nakadasig kaniya nga mosulod sa boksing ug dili niya usikan ang oportunidad niabot kaniya ning panahuna.
Mismong si Pacquiao miingon nga iyang nakita kang Magsayo ang iyang kaugalingon kaniadto dihang wala pa siya mailhi sa tibuok kalibutan.
Gidayeg ni Pacquiao si Magsayo gumikan kay sama kaniya, grabe kini mokayod sa ensayo. (ESL)