Compio: Wala naapod nga ‘ration cards’

Compio: Wala naapod nga ‘ration cards’

DAGHAN karon ang mikakak labi na sa mga residente sa Davao City kay wala sila maapil sa “ration cards” buot-pasabot kung wala kadawat niini gikan sa barangay, dili gyod kadawat og relief goods nga ayuda sa lokal nga kagamhanan.

Pagpasabot sa mga barangay officials nga ilaha na nga gisumite sa City Hall niadtong Dominggo ang pinal nga listahan sa mga pangalan sa mahatagan.

Ngano man nga naay mikakak? Kini gumikan kay wala sila malista, ambot lamang sab, nganong dunay mga barangay sa Davao City nga wa gyod maabot ang tanang kabalayan sa ilang ginsakupan, daw gipamili lang kadtong mga ilado? Wala ta kabalo.

Hinuon walay limit ang gidaghanon, puwede nga tanang residente sa barangay ang makahimulos, APAN kadto lamang mga trabahante nga temporaryo nga nahunong sa ilang trabaho ug kadtong mga self-employed nga naapektuhan gayod gumikan sa bahad sa Coronavirus Disease 2019 (Covid-19).

Migula karon nga giingong daghan ang mga nakakuha sa mga relief goods nga dili mga trabahante, nga bisan mga istambay; ang uban hinuon nga mga trabahante nga nahunong ang trabaho, wala na kakuha.

Pero bisan paman sa hitabo, mas maayo hinuon nga nakakuha ang uban kay mokaon sab baya tawon kita, apan ang mas maayo unta niini dili magtinapulan ang mga barangay social workers sa paglibot sa tanang balay sa ilang barangay.

Naay daghan barangay karon sa Poblacion District, ang nagtinapulan sa paglibot suma pa sa kadaghanan diha sa social media, kay daghan man ang wala nakahimulos ug wala kuno giadtoan sa ilang mga balay. Puwera sa ubang barangay social workers nga nagkugi aron maabot ang tanang balay sa ilang dapit.

Niining panahona, di gyod maayo ang magtinapulan, mga Ma’am ug Sir, kining mga taga barangay atong gitumbok niini, kay tapulan silang matawag kay sayonan mo na nga wala gyod nila naabot ang pinakasuok nga balay sa ilang barangay.

Ang delikado ani kay mibahad baya ang Department of the Interior and Local Government (DILG) nga pangsilotan ang mga barangay kapitan kinsa kadtong manago og mga relief goods ning panahona. Kinahanglan ipang-apod-apod gayod ang tanang nahatud sa barangay nga relief goods.

Motabang gayod og monitor niini karon ang Liga ng mga Barangay nga gipangunahan ni Brgy. 5-A, Bankerohan Kapitan Edgar R. Ibuyan Sr. aron maapod ang tanan.

Hinuon, makapalit paman akong mga kabanay og noodles, itlog, bulad ug bugas. Sa tanan, mag-ampo kita nga grasyahan sa Diyos ug malayo kita ning makamatay karon nga virus.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph