DAVAO DEL SUR -- Posibleng pipila ka sabungero sab sa lalawigan ang apil sa nakasulod sa New Matina Davao Galleria sa wa gipaundang ni Davao City Mayor Sara Duterte-Carpio ang sabong.
Pipila ka mga netizens nga sabungero ang nag-post sa ilang social media kaabot sa sabong dihang taliabot ang Araw ng Davao.
Apan, nanawagan si Duterte-Carpio sa tanang nakasulod sa maong sabungan gikan Marso 6 ngadto Marso 13 nga mopailawom sa 14-day quarantine.
“Everyone who went to the New Matina Davao Gallera from March 6 to March 13, 2020 should be on strict 14-day quarantine,” tataw sa mayor.
Gipahimangnoan sab niini ang pamilya, higala, ka-trabaho ug mga close contacts sa mga nakaadto sa sabungan nga mopailawom sa self-isolation.
“Sa tanan nga miadto sa New Matina Davao Galleria niadtong March 6 hangtod March 13, 2020 ang ilang pamilya, ug mga tawong ilang nahalubilo o nalambigit kinahanglan nga mag-isolate sulod sa 14 ka adlaw,” panawagan sa mayor.
Dugang pa, “Sa mga dunay sip-on, ubo, kalintura, kalibanga o sakit nga tutunlan, palihog og adto sa Sta. Ana Health Center o sa Crossing Bayabas Health Center sa Toril.”
Nasayran nga mipanaw na ang usa Patients Under Investigation (PUI) nga nakaadto sa sabungan samtang gihuwat ang resulta kung nagpositibo ba kini sa coronavirus disease (Covid-19).
Bisan ang pamilya sa namatay nanawagan sab niadtong nakahimo og close association sa biktima nga mopailawom sa self-quarantine ilabi pa kung adunay nasinati nga mga sintomas. (Orlando B. Dinoy)