LUYO ning pit-os nga kahimtang sa panahon sa krisis nga hatud sa coronavirus disease (Covid-19), ang Department of Social Welfare and Development (DSWD) Davao Region moapod-apod na og “cash card” alang sa mga benepisyaryo sa Pantawid Pamilyang Pilipino Program (4Ps) sugod Martes, Marso 24, 2020.
Atol sa gipahigayon nga virtual press conference sa Philippine Information Agency (PIA) Davao Region, gipasabot ni Merlinda Paragamac ang division chief sa Promotive Services sa DSWD-Davao Region nga puwede na nga makuha ang salapi isip cash-grant.
Gipasabot usab sa opisyal nga ang mga benepisyaryo dili na kinahanglan nga moadto pa sa mga ATM machines aron sa pag-withdraw, kun di maghulat lamang sila sa ilang mga link sa munisipyo, o sa link sa lungsod ug mga facilitators sa komunidad aron sayon na lamang alang kanila.
Gawas niini, gipasabot sab ni Paragamac nga aduna usab ginasunod nga sistema sa pagpang-apod-apod sa mga food packs sa pakig-alayon sa Regional Inter-Agency Task Force (IATF) nga gipangunahan ni Davao City Mayor Sara Duterte-Carpio.
Ang DSWD-Davao Region magsugod sa pagpang-apod-apod sa mga relief goods sa Abril 12, 2020 aron mahatagan og lugway ang mga Local Government Units (LGUs) sa pagpangandam.
Dugang pa nga sa programang Health Emergency sa DSWD-Davao Region, giandam sa ahensya ang paghatag og tabang sa mga pamilya nga naapektuhan sa Covid-19 sama sa mga gagmay mga trabahante nga nahunong sa ilang trabaho. (Philippine Information Agency-Davao Region)