Balay giransak, 2 patay

NALIGO sa kaugalingong dugo ang duha ka mga lalaki nga gitouhang gidunggab human giransak ang panimalay nga nadiskubre mga alas 7:30 sa buntag Martes, Marso 24, sa Zone 2, Barangay 1, Malaybalay City, Bukidnon.

Sa inisyal nga imbestigasyon sa Malaybalay City Police Station, nasuta nga nadiskubre ang insidente dihang kini si Wilfredo Eslarang, 38, minyo, usa ka welder sa Limocon House ang nakaabot sa puloy-anan aron unta motrabaho.

Apan pagsulod sa panimalay aron unta moinom og tubig nakurat dihang ang boarder sa sa maong puloy-anan nga si Roger L. Ramonal, 52, ulitawo, usa ka government employee taga P-9, Simaya, Malaybalay City ang wala nay panimout sa kusina ug adunay mga samad dinunggban sa nagkadaiyang parte sa lawas.

Misaka kini sa taas aron unta pahibal-on ang tag iya sa puloy-anan ug iya sab amo apan maoy iyang naabtan sa 2nd floor nga si Aquiliano B. Limocon, 62 usa ka retired Public School Teacher ang naligo sab sa dugo ug adunay samad dinunggaban sa iyang liog.

Sa imbestigasyon sa kapulisan, wala’y nakita nga pwersadong gisulod ang puloy-anan apan nangasibog ang uban gamit ug duha ka vaults ang bukas samtang nabilin ang kasa sa pistol.

Ang mga biktima gisuwayan pa og dala sa Bukidnon Provincial Medical Center, Malaybalay City apan patay na dihang nahidangat.

Giimbestigahan na karon kinsay responsable sa pagpatay sa duha.