GIKLARO ni Fr. Derjohn Faborada ang director sa Social Communications Apostolate Archdiocese of Cagayan de Oro nga walay santos nga misa nga gibalik sa St. Augustine Cathedral Church o uban nga mga simbahan susama sa gipagawas sa usa ka blog page nga kuno gibalik na ang misa.
“Wala gibalik ang public mass sa Cathedral,” pagklaro niini ug mipasabot nga niadtong Dominggo usa ka private mass ilang gihimo alang unta sa live streaming sa radyo ug telibisyon ug facebook ug natayming lang nga dunay mga tao sa gawas ug bukas ang simbahan samtang nagmisa.
Gipasulod na lamang ang pila ka katawhan ug gilimitahan dayon giobserbar ang social distancing.
Tungod sa maong insidente nga naghatag kalibog sa manimbahay nahukman ni Archbishop Antonio Ledesma nga walaon na gyud ang private mass sa Cathedral.
Ug giklaro nga himuon na ang private mass sulod sa Bishop House nga ekslusibo lamang sa mga kaparian.
Adunay skedyul sa misa nga malantaw sa telibisyon sa Parasat Cable TV channel 45 ug Marian Radyo.
Sa alas 10 buntag, Lunes hangtod Sabado ug 8 sa buntag matag adlawng Dominggo.
Gipahibalo sab ni Faborada nga suspendido ang tanan nga mga religous activities sa area sa Cagayan de Oro, MisOr ug Camiguin ning nagkadoul ang pag-obserbar sa Holy Week.
Kining tanan gihimo sa simbahan sa Romanong Katoliko aron pakigbatokan ang Covid-19.