UBOS na sa general community quarantine ang lalawigan sa Misamis Oriental.
Kini basi sa gipagawas nga Executive Order 2020-008 nga pinirmahan ni Misamis Oriental Governor Bambi Emano nga epektibo kini nga kamandoan sa gobernador sugod unya alas 8:00 sa gabii Marso 24, 2020 ngadto April 14, 2020 sa alas 11:59 sa gabii.
Una ning maong kamandoan tanan nga mga tao nga mosulod sa probinsya kung asa nagikan ug nagbiyahe ang gidid-an sa pagsulod sa lalawigan.
Gawas lamang niadtong mga nagdala og suplay sa pagkaon ug uban basic commodities, fuel, medisina, medical supply ug uban pa.
Pasudlon sab ang mga medical practitioner ug mga trabahante sa probinsya nga kinahanglan lamang magpakita og proof pagpamatoud nga sila trabahante.
Sa mga pribado nga kompanya, limitado lamang sa mga trabahante niadtong mga establismento nga gahatag og nag-unang panginahanglan sa katawhan.
Ang kapulisan ang 24 oras nga nakabantay sa checkpoint gikan sa Lunes paingon adlawng Domingo. Sila maoy motugot sa mga ambulansya nga makasulod kung kini adunay emergency slip gikan sa ospital nga gigikanan.
Sa maong kamandoan, gipasabot ni Bambi nga aron malikayan ang posibleng pagkaylap sa Covid-19, ang tanan level 1 ug level 2 private hospital ug Misamis Oriental Provincial Hospital ang kinahanglan nga magmugna og Covid-19 Response Team.
Tanan ospital sa lalawigan ang kinahanglan nga Covid-free ug ang Northern Mindanao Medical Center lamang ang nag-inusarang hospital ng Covid-19 center.
Ang mga barangay Official gimando nga mag monitor sa mga manulod sa kabarangayan ug moreport kanunay sa mga panghitabo ug labaw sa tanan palig-unon ang ilang Barangay Health Emergency Response Team.
Gimando sab ni Emano ang buhatan sa Provincial Social Welfare and Development nga mag-apod-apod ug pagkaon sa kwalipikado nga indigent nga pamilya, kinahanglan nga adunay emergency plan nga himoun aron dili lamang limitado sa pagkaon ang mahatag. Mag invento o magplano kung unsay mahatag nga kalamboan alang sa apektado nga pamilya.
Ang tanan nga mga mayores labina sa lungsod sa Lugait ug Magsaysay maoy gitahasan sa striktong checkpoint, adunay kinahanglan lain lain nga linya alang sa mga plaka sa sakyanan ug mga pasahero ang paagion sa foot bath ug thermal scanners.
Walay pasahero nga pasudlon kung iyang body temperature moabot sa 37.7 degrees Celsius. I-hold kini ug ipabalik sa iyang lugar nga gigikanan.
Ang makasupak ning maong kamandoan ang pahamangtangan og silot.