GIISA ta ang atong mga kamot
Kay buot na ta nga moadto
Sa landong aron mopahuway.
Ug didto nagkatupad ang atong
Mga sampot. Way sentimetro
Ang atong gilay-on sa usag usa
Ug sa dihang nagkasaghid ta
Nanlibawot dayon ang akong
Mga balhibo.
Nasakar sa akong kiliran
Ang imong siko sama
Sa palito ug kaha sa puspuro
Kay inig binag-iray na gani
Sa atong mga lawas mokidlap
Dayon ang mapintas nga kalayo
Nga igo nang mosilab sa daob
Sulod sa akong pagkatawo.
Mora god og mapaig kining
Gilingkuran kong panapton
Tungod sa kapintas sa akong
Kainit nga buot batukan
Sa kabugnaw nga namintana
Sa imong mga mata.
Diha sa imong mga mata
Nga nagduko moagay ang
Mga luhang mangatagak
Diha sa imong pagbakho.
Busa sa ako unyang pagbiya
Malinawon ako nga manaog
Apan ayaw ako takpi sa kalimot.
Mahimo mong kalimtan ang
Akong paglingkod ug pulihan
Ako sa akong gilingkuran aron imo
Nga mabati ang namilit nga kainit
Ug ang inalisngaw sa atong
Panagbag-id dihang milingkod
Ako tupad kanimo.