DEAR Noy Kulas,
Good day. Just call me Im, 23 year old, single but duna koy live-in partner for six months na.
Sa una, daan na siyang palainom, pero wa ko kahibawo nga naa siyay batasan nga magmaoy kon mahubog og maayo. Okay ra man unta nga mahubog siya, apan siya magmaoy. Iyang ipanabi sa iyang mga kainom kon unsa ang among gibuhat sa among private moments. Mismo ako nakadungog mao ako siyang gibadlong, pero mahimo namong away.
Kon sober lang siya, buotan kaayo ang akong kapuyo. Anha ra gani siya mangayo og pasaylo sa iyang gibuhat kon mahuwasan na siya. Wa kuno siya makahibawo sa iyang gibuhat.
Please tabangi ko, Noy Kulas, unsa ang akong buhaton aning akong live-in partner kay mauwaw ko nga ipanabi unsa ang among gibuhat. Makataw-an ko sa among mga silingan kay makahibawo na man sila parte sa among private life.
Unsa man, ako na lang kaha ning buwagan kon di siya mag-usab? Kay ingon pa niya, naanad na siya sa pag-inom. Lain man gud kaayo ang iyang gibuhat.Maorag ubos ra kaayo ang tan-aw na hinuon sa mga tawo namo. Di ba?
Im
Im,
Bitaw, bisan unsa pa, di baya na excuse ang hubog siya unya manabi parte ninyong duha. Lain kaayo na kay makapaubos na sa inyong dignidad, labina ikaw babaye. Lain baya paminawon nga hastang private moments ninyong duha, unsa ang inyong gibuhat, ipubliko. Pagpakaubos na sa imong dignidad isip babaye.
Pakigsultihi siya nga dala ang kalig-on sa imong kaugalingon ug estorya nga wa ka makauyon ug pagpakauwaw ang iyang gibuhat. Kon di siya makausab sa iyang kaugalingon, unsa may punto nga magpadayon mo sa inyong pagpuyo nga di man siya kahibawo nga morespeto kanimo kon mahubog na siya. Kon nagmahal siya nimo, he must change for the better. Kon di siya makahimo anang change, then why continue living together?
Noy Kulas