ORMOC City, Leyte – Padayun ang pagsaka sa ihap sa mga Persons Under Investigation (PUI) ug Persons Under Monitoring (PUM) sa dakbayan sa Ormoc gumikan sa coronavirus disease (Covid-19).
Si Mayor Richard Gomez mibahad sa mga PUI ug PUM nga di siya magduhaduha sa pagpadakop niini kung pabilin kini nga magsuroysuroy ug di motuman sa 14 ka adlaw nga kwarantinas.
“For the sake of public health all registered PUM’s and PUI’s in Ormoc that will be caught roaming outside their residence will be apprehended,” matod sa mayor
Ang PUI o PUM nga masakpan nga wa motuman sa kwarantinas ang ibutang na sa ilang mga barangay isolation room o pwede sab sa ilang mga covered court.
Sa adlaw nga Lunes, Marso 23, naa na sa 66 ang PUI samtang 1,672 ang PUM ug naobserbaran sa taga City Health Department nga dunay paspas nga pagsaka sa ihap.
Gumikan kay walay test kit, mas gipahugtan sa mayor ang border checkpoint sa dakbayan, gipasirhan ang pipila ka mga tindahan ug ang mga nag-abli gihangyo nga ipatuman ang usa ka metro nga distansiya sa usag-usa.Ang mga traysikol drayber gimanduan nga gikan sa unom, dapat tulo nalang ka pasahero ang pasakyon busa nipyait ang uban drayber kay niminos ang ilang kita apan ang City Traffic Enforcement and Management (Team) niingon nga wala maapil sa kamanduan ang pagpangayo og dobleng pasahe.
Nanawagan usab ang Team sa mga pasahero nga sabton lang usab ang mga drayber kay panahon usab karon sa krisis diin pipila lang usab ka traysikol ang nag biyahe.
Gilugwayan usab sa mayor ang class suspension hangtod sa Abril 3, 2020.
Mimando usab ang mayor nga suspensuhon ang water disconnection gumikan sa giatubang nga krisis.
Hangtud sa Marso 31, 2020 ang pagpatuman sa strikto nga border checkpoint sa dakbayan apan kitaon pa kini kung angay ba hunungon o ipadayon. (JKDP)