UPAT ka mga tawo nga nagnegusyo og alcohol sa online gi-entrap sa mga sakop sa Criminal Investigation and Detection Group (CIDG) 7 human namaligya nga mahal pa sa orihinal nga presyo. Tulo nadakpan sa lungsod sa Minglanilla, usa sa Dakbayan sa Sugbo.
Unang nadakpan sa mga sakop sa CIDG 7 ang duha ka online sellers nga taga Tulay, Minglanilla ug taga siyudad sa Naga pasado alas 12 Martes sa udto, Marso 24, sa Barangay Tulay, lungsod sa Minglanilla.
Ang mga nadakpan mao silang Queeny May Rose De Los Reyes, 20; ug Jan-jan Alano, 23, kinsa nakuhaan og mga plastic bottle nga hand sanitizers ug ethyl alcohol sa mahal nga presyo.
Pagka alas 2 sa hapon, nasikop usab ang usa ka 18 anyos nga si Abel Daan Lacida sa Barangay Tulay, lungsod sa Minglanilla, taga Barangay Tungkil sa lungsod nga nakuhaan usab og mga ebidensya sama sa alcohol.
Tulo ka oras ang nakalabay, nakasikop na usab ang laing unit sa CIDG 7 sulod sa usa ka mall nga naa nahimutang sa Barangay Lahug, Siyudad sa Sugbo. Ang nadakpan mao si Rio Espejon, 45, taga Barangay Tisa.
Nakuha sa mga operatiba ang mga binutilya nga isopropyl alcohol nga mobalor og P19,600. Matag botelya gibaligya og tag P200 ang matag usa.
‘Overpriced’
Matod ni Police Major Ronald Allan Tolosa, deputy chief sa CIDG 7, nga ang orihinal nga presyo sa mao nga binotelyang alcohol, base sa price ceiling sa Department of Trade and Industry (DTI), tag P142 lang ang matag botelya, apan gibaligya sa online sellers og tag P220.
“Actually kini sila nag online selling matod pa sa atung paghinabi sa ilaha. Usual ba, involved sila sa online selling kay mao na ang ilang source of income. Because of that ilang gisaka ang ilahang market nila tungod aning situation karon,” matod ni Tolosa.
Dugang ni Tolosa nga ilang tan-awon kon di fake ang maong mga produkto nga makadaot na hinuon sa mogamit pinaagi sa certification gikan sa Food and Drug Administration (FDA).
Ilang nahibaw-an ang illegal nga negosyo sa mga dinakpan pinaagi sa ilang pag search sa social media.
Gani, ni-order pa sila aron masiguro unsa ka tinuod ang ilang pagpamaligya og mahal ngadto sa ilang kustomer.
Kasong overpricing ang ipasaka sa kapulisan batok sa mga suspek dungan sa panawagan ngadto sa mga naghimo niini nga di nila pahimuslan ang panahon nga nanginahanglan ang publiko sa mga disinfectant tungod sa corona virus disease 2019 (Covid-19).