ANG Dakbayan sa Lapu-Lapu ipaubos sa enhanced community quarantine nga moepekto sa pagkapupus sa 72 oras.
Kini human nga adunay usa ka presumptive positive sa coronavirus disease Covid-19 sa dakbayan base taho sa Department of Health DOH 7 (DOH) 7.
Si Gobernador Gwendolyn Garcia gitakda usab nga moluwat og kamandoan sa samang lakang.
Bisan sa mando ni Mayor Junard Chan, ang duha ka mga taytayan nga nagdugtong sa Dakbayan sa Lapu-Lapu ug mainland Cebu bukas gihapon.
Gikinahanglan hinuon nga dunay quarantine pass ang mga tawo ug mga sakyanan nga manabok.
Ang mando ni Chan giluwatan human sa presumptive positive sa Covid-19, o gidudahan nga positibo sa coronavirus.
Ipaubos pa kini sa confirmation sa Research Institute for Tropical Medicines (RITM), matod ni Dr, Jaime Bernadas, regional director sa DOH 7.
Apan bisan pa niini, nakadesisyon na si Chan nga di na mohuwat pa nga mograbe ang pagkatap sa virus sa dakbayan.
Hilabi na nga ang dakbayan usa ka ra ka isla nga ang katawhan nagtuyok-tuyok ra kanunay.
Gibutyag ni Chan nga ubos sa kamandoan, wala nay pampublikong transportasyon nga magdagan ug sirado na ang mga business establishments gawas lang sa pharmacy, groceries, hospital, bangko ug water refilling stations.
Wa na usay tugotan nga adunay makagawas-gawas sa ilang mga balay, gawas lang sa mga adunay medical emergency ug mga trabahante sa dakbayan sa mga abli nga establisemento.
Ang maong mga trabahante nagtrabaho sa ospital, pharmacy, bangko ug groceries, apan kinahanglan adunay quarantine pass nga iisyu sa kagamhanan.
Bukas usab ang mga kan-anan ug fastfood chains, basta takeout lang, way mokaon sa sud.
Mahimo usab makasulod sa dakbayan ang mga trabahante nga taga laing lugar.
Apan nagtrabaho sa mga establisimento nga padayong abli bisan sa gipatumang enhanced community quarantine basta aduna lang usab silay quarantine pass.
“Naa nay 1 case presumptive positive sa syudad sa Lapu-Lapu. Ug mangutana mo unsay lakang nga buhaton sa Siyudad sa Lapu-Lapu, kita dili ta paabot nga mo-spread ang maong virus sa atong siyudad. Now that we know nga naa na ni siya, which is subject for confirmatory test sa RITM, I decided nga we have this enhanced community quarantine,” matod ni Chan dihang nahinabi sa mga tigbalita.
Samtang gipahibawo ni Atty. James Sayson, OIC city legal officer sa dakbayan sa Lapu-Lapu, nga ang matag balay adunay usa ka miyembro o sakop sa pamilya nga mahimong makagawas aron mamalit o mangompra.
Apan kinahanglan sila nga mokuha og quarantine pass sa barangay diin sila nanimuyo.
Gumikan kay way biyahe sa pampublikong transportasyon, mopaangay ang kagamhanan og usa ka bus sa matag barangay nga maoy sakyan sa mangompra ug mopalit.
Apan sabotan pa usab ang schedule kalabot niini aron di maghuot sa bus ug sa ingon mapatuman ang social distancing.
Gawas sa mga bus sa matag barangay, aduna usay bus nga ipaangay ang kagamhanan nga mag-estambay sa Lapu-Lapu City Hall nga mahimong masakyan sa mga trabahante nga padayong motrabaho ubos sa enhanced community quarantine sa dakbayan ug sa gawas sa dakbayan usab nga syudad.
Mahimo usab ihatod og sakyanan ang maong mga trabahante sa ilang mga kabanay kon di sila mosakay sa bus sa dakbayan basta aduna lang silay quarantine pass.
Susama usab ang mahitabo sa mga trabahante nga mogawas sa dakbayan nga nagtrabaho sa ubang lugar basta aduna lang silay quarantine pass.
“Katong way kasakyan sa mag grocery naa tay sistema. Mag-coordinate ta sa barangay. Naa tay schedule like for this day, naay 8 to 10, naay 8 to 11 unya naa na puy mag grocery og 12 to 3. Naa tay sistema lista lista sila para ma-follow ang social distancing. So, i-assure nato ang mga Oponganon nga og mag grocery gani, di mo magpanic kay pwedi mo mag grocery. Og wala moy kasakyan, duna moy kasakyan. I-schedule lang nato,” matod ni Sayson.
Matod ni Sayson nga tungod sa quarantine, ang Mactan Export Zone sirhan hangtod sa Abril 14, 2020.
Lalawigan
Gilauman nga ipaubos na sa enhanced community quarantine o lockdown ang lalawigan sa Sugbo karong semanaha.
Kini maoy gianunsyo ni Garcia sa Miyerkules, Marso 25, 2020.
“In accordance with the IATF resolution, when there are two separate positive cases in two separate local government units, even if this be an independent city, then we can already call for a community quarantine or enhanced community quarantine. So, definitely padung ta diha ang importante nga coordinated ang tanan nato nga lihok”, matod ni Garcia.
“I will be issuing an executive order to declare Cebu under enhanced community quarantine or in other words, lockdown,” matod ni Garcia.
Base sa bag-o nga datos nga natala sa Department of Health (DOH) 7, gipahibawo ni Dr. Jaime Bernadas, pangu sa buhatan, nga may 10 na ka mga kaso ang gidudahang nag positibo sa Covid-19.
Apan matod ni Bernadas nga ipaubos pa kini sa dugang kompirmasyon.