NAKUMPISKA sa National Bureau of Investigation (NBI) ang ubay-ubay ka mga thermal scanner atol sa entrapment operation niadtong Marso 24 mga ala 1:00 sa hapon sa Barangay Gusa, siyudad sa Cagayan de Oro.
Ang operasiyon inubanan sa Food and Drug Administration (FDA), Department of Trade and Industry (DTI), Regulatory Compliance Board (RCB), City Price Coordinating Council (CPCC) ug opisyal sa barangay.
Gipanag-iyahan kini sa pamilya Chiong kinsa giingong usa ka medical suppliers.
Mokabat ngadto sa P1,900,028 ang kantidad sa maong mga thermal scanner diin ang orihinal nga presyo anaa lang sa P300-P500 apan gibaligya kini og P9,500 matag usa ug anaa kini sa 203 ka buok.
Gibutyag ni Atty. Patricio Bernales, regional director sa NBI, nga sobra ka mahal sa presyo ang pagbaligya niini.
"Sobra siya'g presyo, overprice unya wala na ni baligya karon sila na lang naa. And then sa atong mandate karon nga motan-aw sa overpricing, hoarding naapil ni siya," matud ni Bernales.
Samtang gibutyag ni Antonio Resma Jr., Inspectorate Team leader, nga wala kini silay mapakitang mga dokumento.
"They failed to present the appropriate and necessary certificate of product registration (CPR), and License to Operate (LTO) from the supplier," matud ni Resma.
Gibutyag ni Resma nga medical supplier kini ug duna kini silay lisensiya o business permit sa dakbayan ug gani ga-suplay sila sa mga local government unit (LGU).
Giingong dili mahimo nga dili masusi ang mga thermal scanner kung epektibo ba gyud kini.
Posibleng pasakaan og kaso nga paglapas sa Consumer Act of the Philippines (no proper label), Price Act (profiteering), Republic Act 9711 (mandatory labeling requirement), ug uban pa ang maong supplier human sa mga kalapasan nga nahimo.