DAGHAN karon ang mga residente nga giingong wala mahilakip nga nakadawat og rasyon gikan sa lokal na kagamhanan sa Davao City. Rasyon nga alang sa tanan kay ang tawo mangaon man gyod; modawat gyod ang tawo niini labi na nga ania ang Pilipinas ug tibuok kalibutan sa krisis nga dala niining Coronavirus Disease 2019 (Covid-19).
Niadtong Lunes, daghan na sa mga barangay sa Davao City gikan sa 182 ka mga barangay ang naunang nahatagan og rasyon. Naulahi lamang ang ubang barangay gumikan gibiripika pa sa LGU-Davao ang mga pangalan nga gisumite sa mga barangay social workers.
Apan sa pagsugod na sa paghinatagay, diha’y mga mikakak nga mga residente kinsa natingala nganong wala sila maapil sa listahan? Mudo, wala gyod sila kadawat, naglaway sila sa mga silingan nga nakadawat og mga bugas, sardinas, ug uban pang mga pagkaong de lata.
Karon, ang nahitabo, girumbo sa mga residente nga wala nalista ang ilang barangay, ug nangatarungan ang barangay nga ila na kuno nga napasa ang listahan sa City hall.
Kini ba ka ha ang resulta sa pagkatapulan sa pipila ka mga taga barangay nga wala nila suhira, wala nila sudla ang mga suok nga mga kabalayan sa ilang barangay? Kung naa may pagpanglista nga naglingkod ra sila sa ilang barangay unta naghimo sila og rekurida, usa ka pahibalo sa tanan gamit ang trompa nga dunay pagpanglista aron sa ingon makabalo ang tanan.
Nasuta nga walay nahitabo sa ubang barangay nga naneguro nga malista ang halos tanang residente, pwera sa pipila ka barangay nga mihimo gayod og pamaagi aron malista ang pinakakabus nga residente kinsa kadtong nahunong sa trabaho tungod sa Covid-19.
Nagbahad baya gyud si Pangulong Rodrigo Duterte nga kung dunay mga pulpol nga barangay kapitan labi na niining giatubang nga krisis karon, iya gayod nga pagasilotan.
Ngari sa Davao City dunay giingong daghang mga kapitan nga nagpabuyag, labi na niining pagpang-apod-apod sa ration cards, kanus-a man kini sila mahibal-an sa lokal nga kagamhanan?
Luoy lamang ang kabus, kadtong naghulat tawon sa ilang mga balay nga wala naadtoan sa mga barangay social workers, kay dili gyod sila kadawat og rasyon nga mga pagkaon, tawon.
Pipila ka adlaw gikan karon, unta masayran kini sa lokal nga kagamhanan sa Davao City aron matul-id kining mga pulpol ug nagtinapulan nga mga barangay kapitan, labi na ngari sa Poblacion District.