GIDAYEG ni Philippine Olympic Committee (POC) president Abraham Tolentino ang desisyon sa International Olympic Committee (IOC) ug ni Japan Prime Minister Shinzo Abe nga iuswag ang pagpahigayon sa 2020 Tokyo Olympics.
Si Abe ug IOC president Thomas Bach ningpadayag kagahapon nga nagkauyon sila nga iuswag ang Tokyo Games sa sunod tuig gumikan sa padayon nga pagpanghulga sa coronavirus disease (Covid-19) nga nakatakod na og kapin sa 380,000 ka mga tawo sa tibuok kalibutan.
Mao kini ang labing unang higayon nga nauswag ang matag upat ka mga tuig nga kompetisyon. Alang kang Tolentino, sakto ang desisyon nila ni Abe ug Bach.
“It’s the right decision -- for athletes, officials, organizers, and spectators, for our safety,” matod ni Tolentino sa interbyu sa www.abs-cbnnews.com.
Si Tolentino nipadayag sa iyang suporta dihang nanawagan pa ang higanteng mga puwersa sa United States. Australia, Canada, ug New Zealand nga iuswag ang prestihiyusong kompetisyon.
Sa wala pa mibuhi og desisyon ang IOC ug Japan, ang Canada mitataw nang daan nga dili kini magpadala og delegasyon kon ipadayon ang Tokyo Olympics sa orihinal niining petsa nga gikatakda untang sugdan karong Hulyo ning tuiga.
Ang pagkauswag sa Tokyo Olympics maayong balita alang sa Pinoy nga mga atleta hilabi na sa mga naka-qualify na sa kompetisyon.
Gipangtumbok mao sila si pole-vaulter EJ Obiena, gymnast Carlos Yulo, ug ang mga boksidor nga sila si Irish Magno ug Eumir Marcial.
Gilaumang maka-qualify sab sa Tokyo Games sila si weightlifter Hidilyn Diaz, silver medalist sa Rio niadtong 2016, skateboarder Margielyn Didal ug judoka Kiyomi Watanabe.
“May chance pa rin tayo sa medals for those who qualified, because they can train more. (Others have a) chance to qualify too,” matod ni Tolentino.
Tanang 33 ka sporting events nga naglangkob sa Tokyo Games pulos wala pa nakahuman sa ilang qualification stage gumikan sa kahasol nga hatod sa Covid-19 pandemic. (ESL)