ADUNA na unya’y kaugalingong homecourt ang Los Angeles Clippers ug dili na kini makigbahin sa Los Angeles Lakers sa paggamit sa Staples Center isip ilang balwarte sa National Basketball Association (NBA).
Ang tag-iya sa Clippers nga si billionaire Steve Ballmer mopalit sa The Forum sa kantidad nga $400 million aron himuong homecourt sa Clippers.
Ning maong kalambuan, naputol na sab ang legal battle ni Ballmer batok sa tag-iya sa The Forum nga mao ang Madison Square Garden Company alang sa plano niyang magtukod unta og bag-ong arena alang sa Clippers sa Inglewood, California.
Si Ballmer, kinsa kanhi Microsoft executive, ug Clippers vice chairman Dennis Wong nakigtrans-aksyon pinaagi sa CAPSS LLC, bag-ong naporma nga grupo nga padayong mopadagan sa Forum isip live music venue.
“This is an unprecedented time, but we believe in our collective future,” batbat ni Ballmer. “We are committed to our investment in the City of Inglewood, which will be good for the community, the Clippers and our fans.”
Tatawng nahadlok nga makompetensiyahan sa pagpahigayon og mga konsiyerto ug uban pang dagkong events, ang MSG agresibong misuway pagpakgang sa plano unta ni Ballmer nga magtukod og state-of-the-art, 18,000-seat venue alang sa Clippers nga nahimutang sa Prairie Avenue duol sa The Forum.
Apan ning maong kalambuan nga paliton na ni Ballmer ang Forum, hayan dihadiha dayon naputol ang iyang pagpakigsumpaki sa MSG Company.
Nakatutok na karon ang atensyon ni Ballmer sa pagtukod og bag-ong homecourt alang sa Clippers nga ilaha nang magamit inig ka pupos sa kontrata sa iyang abangan sa Staples Center. (AP, ESL)