SA MAKAUSA pa, gihamok na usab og laing kontrobersiya ang bag-ong konsehala sa dakbayan sa Sugbo nga si Niña Mabatid.
Ning higayona, kalabot na sa iyang sensitibong gi-post sa Facebook nga kabahin sa coronavirus nga nakahagdaw og managlahing reaksiyon.
“Three died already with suspected Covid here in Cebu City. Namatay na lang wa pa gihapon na-confirm. I can just imagine pila na kaha kabuok positive. I believe there are more than 10 already that are in the hospital now. So pls stay home everyone. This is the only way to slow down the spread of the virus.”
Tipik sa gi-post ni Mabatid sa iyang Facebook page.
Ambot og unsay igong basehanan sa konsehal niining iyang gi-post nga wala man siyay gi-presentar nga lig-ong ebidensiya mga makasuportar niini.
Duna man tuoy mituo apan labing siguro daghan usab ang gibati og kalisang sa maong post. Mahimong maka-panic kini sa publiko nga makapasamot na hinuon sa sitwasyon.
Daghan ang nahibulong kon nganong midiretso ra siya og post niini nga wa mokonsulta sa mga ahensiya nga maoy gihatagan og otoridad sa pagbutyag sa ingon aning mga kaso.
Masabot sab nga wa siya mo-coordinate o bisan respeto na lang sa iyang mga kauban diha sa City Hall nga anaa permi mag-yampungad sa buhatan nga nag-inunungay sa pagpangita og solusyon.
Tinuod nga isip pinili o opisyal sa dakbayan, aduna siyay katungod sa pagsabwag ngadto sa publiko kon unsa ang panghitabo sa palibot, apan kinahanglan usab nga mosubay siya sa saktong proseso ilabi na ang pagpakig-ayuda sa ubang mga opisyal aron dili magkayamukat ang dagan.
Magsilbi unta kining leksiyon ni Mabatid isip bag-ong konsehal sa dakbayan. Pagpakig-ayuda ug motuman kon unsay kasabutan aron mokab-ot ang katuyoan.