NIMANDO si Cebu Governor Gwendolyn Garcia sa pagpatuman sa usa ka enhanced community quarantine (ECQ) sa tibuok lalawigan sa Sugbo sugod karong adlawa. Samang mando giluwatan ni Cebu City Mayor Edgardo Labella alang sa syudad sugod ugmang adlawa.
Ang ECQ unang gipatuman didto sa entiro Luzon. Limitado ang lihok sa katawhan, gipahunong ang mass public transportation apan sigi ang delivery sa mga pagkaon ug kargamento ug nagpabiling abli ang supermarkets ug mga merkado..
Di ba ang ECQ sama ra sa lockdown? Ang paggamit sa termino nga lockdown gilikayan bisan ni Presidente Rodrigo Duterte. Apan karon one-third sa populasyon sa tibuok kalibotan ubos na sa lockdown tungod sa corona virus nga moresulta sa Covid-19.
Sanglit lockdown man ang gigamit sa laing mga nasod, mangutana kita kon unsa kini ka epektibo? Ang mga public health experts nagkauyon nga makasanta kini sa pagkatap sa Covid-19.
Gipatuman ang lockdown didto sa Wuhan, China, ang unang lugar nga gihugpaan sa coronavirus nga karon kontrolado na. Gipatuman usab kini sa Hong Kong ug nakontrolar sab ang pagkatap sa corona virus. Apan sa dihang gilibkas, nibalik ang corona virus, dala sa taga Hong Kong nga namauli gikan sa laing mga nasod.
Nikuyanap ang Covid-19 sa mga nasod sama sa Italya, Espanya ug Estados Unidos nga dugay nga nipatuman og lockdown. Di tiaw ang Covid-19 kay kapin na sa 21,000 ang nangamatay ug kapin na sa 471,000 ang gitakboyan niini sa tibuok kalibotan.
Usa sa atong mga gikabalak-an sa pagpatuman sa ECQ dinhi sa ato mao nga unsa na lang ang kan-on sa mga tawo nga mawad-an sa ilang mga trabaho.
Ang unang maigo niini mao kadtong mga tawo kinsang trabaho ubos sa “no work, no pay.” Maayo lang kadtong “no work, always pay”
Dubay pasiaw bahin sa usa ka asawa nga nihangyo sa pangulo nga ilibkas na ang quarantine kay hapdos na ang iyang bugan sa sigig dug sa iyang bana. Maagwanta na, pero ang gutom di. Way makatagna kon unsay buhaton sa mga tawo nga gipanggutom.