POSIBLE karong adlawa modeklarar si Gov. Gwen Garcia og enhanced community quarantine o “lockdown” sa lalawigan sa Sugbo sugod karong gabii. Kini nunot sa pagbutyag sa Department of Health (DOH 7) nga adunay mga “presumptive positive” sa coronavirus disease (Covid 19) sa dakbayan sa Sugbo ug dakbayan sa Lapu-Lapu. Si Cebu City Mayor Edgardo Labella naghuwat ra sa desisyon ni Gwen.
Ambot og nganong karon pa gibutyag sa taga DOH nga adunay daghang nagpositibo sa initial test dinhi sa dakbayan. Morag ilang gitago ang pasi-unang resulta sa publiko kay ila pang gihuwat ang confirmatory test sa Research Institute for Tropical Medicine (RITM) sa kauluhan nga puwerting dugaya mo-abot. Kon gibutyag pa dayon kini sa taga DOH, dugay ra unta nga nakahimo og mas istriktong lakang ang mga lokal nga kagamhanan pagpugong sa pagkuyanap sa Covid-19.
Morag uwak ning taga DOH nga bisan og nagtangag na, moingon gihapon og “wa.” Mao nang di sila makabasol sa publiko nga mo-akusar nga aduna silay gitago. Nganong wala man motumaw kining termino nga “presumptive positive”? Diin man kini kaniadto ang walo? Matod sa DOH nga duna silay walo ka resulta nga gidala ngadto sa RITM. Buot bang ipasabot nga ang walo ka local results sa Vicente Sotto Memorial Medical Center (VSMMC) pulos positibo?
Hinaot nga hunahunaon una og maayo sa mga lokal nga opisyal ang ilang desisyon nga ipa-ubos sa lalawigan sa Sugbo o bisan asang local government unit sa “lockdown.” Kon unsa ang resulta sa ilang desisyon, sila ra usab ang angay manubag sa katawhan. Ila unta nga panaminan ang nahitabo sa National Capital Region (NCR) ug tibuok Luzon nga gibutang sa “lockdown” sa nasudnong pangagamhanan.
Andam ba ang atong local government units apil na ang provincial government kon ilang ipatuman ang “lockdown”? Aduna bay igong supply sa pagkaon alang niadtong mga tawo nga wala nay nakaon? Naa tuod mapalit nga mga pagkaon. Apan unsa man ang ipalit kon walay kuwarta ang mga tawo kay wala nay suweldo o income? Mohatod kaha ang kagamhanan og pagkaon sa mga tawo ngadto sa ganghaan sa mga balay? Dili kaha motumaw ang kagubot ug kaguliyang kon kagutom nay maghari? Ambot lang.