DAGHAN kaayo ang mga impormasyon sa social media kalabot sa coronavirus disease (Covid-19-19). Dunay mga naghisgot og positibo nga mga tawo sa Covid-19 bisan kon ang Department of Health (DOH) wa pa moluwat og pamahayag niini sa publiko.
Sa ato pa, ang impormasyon wa pa maayag ug wa pa nakompirmar, busa puro ra kini mga estorya, hungihong. Usa lang ang tinubdan nga angay tuohan karong panahuna, kon di ang kagamhanan. Ning Covid-19-19, ang DOH maoy angay paminawon.
Ang mga journalist, kon nakadawat og mga impormasyon, susihon kini kon unsa ka tinuod. Adto kini sa nagkadaiyang mga tinubdan, sama sa mga ahensya sa kagamhanan ug uban pa, magsusi. Di lang usa ka tinubdan sa kasayuran ang kuhaan hangtod maayag kon unsa ang matuod.
Busa, kon kasaligang mga impormasyon ang imong gusto, sa mga news organization o outlet lang pagkuha. Sa makalibog nga mga impormasyon nga nagbaha sa social media, diin daghan usab ang fake news, ang lehitimong mga media organization mao lang ang angay saligan karong panahuna. Way mga impormasyon nga gipagawas nga wa giayag hangtod nga migawas unsa ang tinuod ug matuod. Sa ato pa, di fake news.
Sa panahon karon sa teknolohiya ug social media, paspas man tuod ang paghatod sa mga balita, ang mga impormasyon nga gipanghatod ug gipatik, nasusi nga tinuod ug husto. Tingali, dunay ginagmay nga mga sayop, sama sa spelling ug grammar, apan sa kinatibuk-an, ang kasayuran husto ug tukma kaayo. Ang gagmay nga mga sayop bunga sa pinaspasay taliwa usab sa kompetisyon.
Busa, panahon ning enhanced community quarantine, nga maisip usab nga lockdown, ang makuhaan og hustong impormasyon karon nga katuohan, mao lang ang legitimate news organizations. Kon duna kay masugatang mga estorya, labina sa social media, unya wa sa mga tigbalita, isipa una kining mga hungihong lang.