Sa tinuoray, taudtaud sab gyud una ni-sink in o hingpit nakong nasabtan ug naamguhan unsa kakuyaw, kadelikado ug katalandugon ang kahimtang nato tungod sa pagkatap sa corona virus sa kalibutan ug sa Pilipinas.
Sa dihang may mga pahimangno na nga angay magpuyo ug di magsigeg gawas sa balay, nakaamgo ko nga di na gyud bastabasta ang sitwasyon. Di na mahimong di ta maminaw sa mga awtoridad ug maghimog mga lakang nga makaangin sa uban.
Di karon ang panahon sa pagpabilib, sa pagpanaway, sa pagkontra sa mga awtoridad. Panahon karon sa pagsabot, pagtinabangay, pagkakalma ug labaw sa tanan, sa pagpaubos ug paghangad sa kahitas-an aron kaluy-an ug tabangan kita Niya.
Di lang gyud ta magpakawala sa paglaum.
•••
Dako og tabang ang mga salida sa telebisyon, bisan tuod og replay ang uban, aron di ta ‘mamatay’ sa kalaay ug mapraning sulod sa balay. Apil usab ani ang internet nga makahatag natog mga kasayuran ug kalingawan.
Di na ko mahibulong nga modako ang bayranan sa kuryente. Paet!
•••
Mga pahalipay sa GMA 7 sa pagkahimo niining digital powerhouse nga dunay 44 million followers. Ang Public Affairs social media team nilampos sa pagdala sa mga programa niini sa mga batan-on.
Nag-una niini ang Kapuso Mo, Jessica Soho nga may kapin sa 11 milyones ka likes sa Facebook. Ang TikTok account niini may 150 mil ka followers bisan wa pa maabti og usa ka bulan.
Magsaulog sa iyang ika-70 nga anibersaryo ang GMA Network uban sa undanong mga kasayuran nga magpamatuod sa linyang ‘Serbisyong Totoo.’
•••
Nakadayeg ko sa gipahigayon nga Pantawid Ng Pag-ibig At Home Together Concert sa Kapamilya stars adtong Dominggo. Giingong niani kinig kapin sa tres milyones ka mga tumatan-aw.
Nakapakita kini di lang sa abilidad ug pagpakabana sa mga nagpasundayag hasta usab sa modernong teknolohiya nga nakapapundok nila sa usa ka pasundayag bisan tua sila sa tagsatagsa nila ka pinuy-anan.
Pero wa lang gyud unta to pakantaha ang way abilidad sa pagkanta. Duna bayay uban nga nipadangat lang sa ilang undanon nga mga mensahe.