KINI naman seguro ang panahon nga mag-panic na? Kay sayonan mo na, pag-agi nako sa Metro Circle sa palengke sa Bankerohan sa Davao City Huwebes, Marso 26, perteng daghana og tawo, ang ilang mga lihok daw mora’g mahutdan og mga gulayon.
Paspas nga nag-inalsahay og mga selopin ug bayong nga dunay daghang sud nga mga lagutmon ug gulayon. Sa akong kaugalingon, nakuyawan sab ko, ug miingon ko nga basin mao na kini ang panahon nga moapil pod kos pagpa-panic.
Una niini, mikatag man gud sa social media nga manghatag ug ipatuman na ang istrikto nga paggawas sa panimalay, dili suma pa basta-basta kagawas kung wala quarantine pass, work pass, food and medicine pass ug di na suma pa kuno tugtan ang mga dyip ug traysikol, traysikad nga mamasada, kinsay di makuyawan niana?
Ang impormasyon sa Facebook mihatud og ka-panic sa mga tawo, gani ang Calinan Public Market mao sab ang nahitabo, kay lagi giunahan man og pasiatab aning kapitan kuno sa Calinan nga kuno, istrikto na nga ipatuman ang quarantine pass ug ipatuman ang lockdown sa maong area.
Gilayong sukoa higala ni Davao City Mayor Sara Duterte-Carpio, miulbo tawon kadali ang dugo sa Mayora, kay mihatag naman og ka-panic ang maong nagkatag nga impormasyon, hinungdan nga gipahunong ni Mayor Sara ang pagpang-hatag og mga quarantine pass sa 182 ka mga barangay.
Bisan sa mga department stores sa mga malls, labihang taasa sa linya sa mga tawo kay lagi nangahadlok na nga basin unya dili na sila kagawas sa balay ug lisod na kaayo ang pagpalit og pagkaon.
Nadugangan sab kini nga kabalaka human gipatuman ang social distancing sa pagpamalengke sa mga palengke ning siyudad, ang Agdao ug Bankerohan una ka makasulod sa palengke, kinahanglan pa nga maglinya og halos tunga sa oras, dayon manghunaw sa kamot una mosud, butang nga nakapadugang sa kabalaka sa mga tawo.
Hinuon usa gayod kini ka maayong lakang, apan ang pagpasiatab sa Facebook maoy nakapa-kuyaw sa mga tawo, pero giingon sa kadaghanan nga mas maayong maneguro kaysa didto na molihok kung anaa na sa “oras de peligro”.
Kagahapon, nagkugi dayon sa paglibot ug nagpahibalo sa mga residente ang mga kapitan sa bag-ong guidelines ug advisory nga gipagula sa lokal nga kagamhanan. Gipahibalo nga ang mga buntis, dunay mga balatian, mga senior citizens ug mga menor de edad dili na puwede pagawson sa panimalay.
Gisayuhan na sab sa alas 5 ang pagpatuman sa liquor ban ug ang istrikto nga paghibalo nga kung moabot ang alas 5 sa hapon, dili na mag-istambay gawas o sa tugkaran sa panimalay, kinahanglan anaa sa sud agi’g pagpangandam sa alas 9 nga curfew padung alas 5 sa buntag.
Kini nga mga istrikto nga pagpatuman, kaayohan kini natong tanan mga higala, busa dili kita magsige og reklamo nga gipul-an na kita sud sa balay, kaysa labi’g di kita motuman, mosugot ba kita nga maparihas kita sa nasud Italy nga wala dayon mipatuman sa mga preventive measures sa dihang ilang nasayran nga duna nay mga nataptan og Covid-19 sa ilang mga dapit?
Mas pilion pa nako nga magpundo sa balay, hangtud maabot gayod ang takna nga mamahimong luwas na kita sa Covid-19. Isipon nato nga usa ra ang kinabuhi, apan daghan ang pamaagi sa paglikay. Amping mga higala, ubani sa pag-ampo sa Diyos gumikan walay imposible Kaniya.