SUPERBALITA CEBU

Mag-lockdown nang Cebu

NAGLUMBAG PANGULI. Ingon niini ka baga ang duot sa katawhan nga nanaglinya kilid sa N. Bacalso Avenue, Cebu City gawas sa Cebu South Bus Terminal (CSBT) kay nanagdali pagpanguli sa kabalaka nga maabtan sa enhanced community quarantine nga ipatuman karong tapos sa semana. Ang Probinsya sa Sugbo ug ang mga siyudad sa Cebu, Mandaue ug Lapu-Lapu dunay nay giluwatang executive orders alang sa “lockdown.” (Alex Badayos)

ANG Dakbayan sa Sugbo ug Cordova mideklarar og Enhanced Community Quarantine (ECQ) human sa pagdeklarar sa Dakbayan sa Lapu-Lapu.

Si Gobernador Gwendolyn Garcia nakigtagbo usab sa mga mayor alang sa pagpatuman sa "lockdown" sa tibuok Sugbo.

Usa ka karsada sa Dakbayan sa Mandaue gipaubos usab sa ECQ.

Tungod niini, nag-panic buying ang publiko, diin ang dagkong mga tindahan ug botika gipanglinyahan, apan ang tagsa ka konsumidor wa makapatuyang kay gi-limit ra sa management ang makasulod ug mapalit sa matag usa.(Estorya sa pahina 3).

Bisan sa ECQ nga susama na og lockdown, ang mga kan-anan, botika, department stores ug mga merkado magpabiling bukas.

Ang gilimitahan mao ang paglihok sa publiko, labina sa matag panimalay, diin usa lang ang mahimong makawas.

Cebu City

Gipaubos ni Mayor Edgardo Labella sa ECQ ang dakbayan sa Sugbo sugod Sabado sa udto, Marso 28 hangtod Abril 28 sa udto gumikan sa padayong hulga sa Covid-19.

Sa Executive Order No. 064 nga giisyo ni Labella sa, Marso 27, gisuspenso usab niini ang biyahe sa tanang de pasaheroan ug pribadong sakyanan gawas lang sa government vehicles ug mga sakyanang pribado nga gitugotan sa mayor.

Apan ang City Government adunay gipabiyahe nga mga bus para maoy mopasakay sa mga pasahero nga wa nay masakyan.

Gipahimug-atan sa EO mao ang Mandatory Stay at Home Order diin ang tanang individual sa siyudad kinahanglan nga magpundo sa balay. Gawas sa usa ka miyembro nga gitugotan nga makagawas para maoy masugo sa mga panginahanglan.

Ang mga buhatan sa gobyerno nga nagtunol sa batakang serbisyo magpadayon sa pagserbisyo apan kinahanglan gihapon nga ilang matuman ang 40 ka oras nga kada semana nga maoy nalatid sa memorandum circular sa Civil Service Commission.

Si Labella nimando usab subay sa EO-64 sa pagsirado sa tanang business establishments hangtod sa Abril 28.

Apan adunay gitugotan nga makaabli kinsa maoy namaligya sa importanteng tinda para aduna gihapoy mapalit ang mga gitugotan nga makagawas sa ilang balay panahon sa ECQ.

Ang hotels, pension houses ug susamang mga establisemento wla na usab gitugotan nga moabli gawas lang kon adunay kasamtangang guests nga naka-check-in na sukad niadtong Marso 26 ug kadtong guests nga adunay long term booking.

Ang tanang Business Process Outsourcing (BP0) ug Knowledge Process Outsourcing (KPO) ug export-oriented industries makapadayon sa ilang operasyon, apan kinahanglan nga ilang ipatuman ang Business Contingency Measures subay sa EO No. 062.

Subay sa maong EO, wala nay gitugotan nga mga sakyanan nga makagawas ug masulod sa border sa Cebu City samtang aduna pay ECQ, apan adunay mga sakyanan nga gitugotan sa mga otoridad.

Ang Cebu City Government, pinaagi sa mga pulis pinangulohan ni Police Colonel Hector Grijaldo, mopahugot sa pagbantay sa border pinaagi sa health checkpoint aron masiguro nga way makasulod-gawas nga mga tawo ug sakyanan gawas lang niadtong Authorized Person Outside Residence (Apor).

Gibauran sab ni Labella ang mga tawo nga magpataka lang og pakatap og dli tinuod nga kasayuran labot sa Covid nga mag-atubang sila og kiha ubos sa pagpangulo ni Atty. Rey Gealon sa City Legal Office.

Ang PNP, Probe ug Business Permit section gimanduan sa pagpatuman sa EO-64 ug pasakaan og kaso kadtong dili motuman.

Gimanduan usab ang mga barangay kapitan, kagawad ug kawani sa barangay sa pagpatuman sa order.

Kadtong di mopatuman sa EO mag-atubang og sumbong sa Ombudsman.

Apan abli gihapon ang nagtinda og basic commodities ug ang nagtinda og pagkaon apan limitado lang ang makagawas sa balay.

Sa lockdown, waa nay gitugotan nga makagawas sa balay ug hatagan nalang og pagkaon ang apektadong mga residente. Ang mga EO nga unang giisyu ni Labella epektibo gihapon.



Exempted

• Medical practitioners, officers, hospital staff, nurses ug health volunteers nga apil sa frontliners batok Covid 19.

• tanang tigutogan sa national ug local government official ug employees

• Drivers ug personnel para sa delivery vehicles sa tanang klase sa cargo; construction workers nga gitugotan sa City Government, accredited media personnel

• Mag-uuma ug mangingisda ug agri-business personnel

• Tawo nga gustong magpatambal ug kadtong anaa sa tambalanan gitutogan sab nga adunay usa ka kauban.

• Mga empleyado sa mga business establishment nga gitugotan nga maka-operate

Magpabiling bukas

• ospital, clinic ug laboratories, botika, gasoline stations

• cargo handlers, forwarders, shipping lines, truckers, container yards

• water, electricity , cable ug telecommunication companies

• funeral parlors

• Establisementong nagbuhat og medical supplies

• Trabaho nga nag-deliver og serbisyo sama sa paghatod og pagkaon, tambal ug ubang batakang panginahanglan.

• manufacturer sa pagkaon ug mga supplier

• public market, supermarket, groceries, bakeshops ug convenient stores

• Water refilling stations, veterinary clinics, animal food suppliers. (dugang taho ni KFD, GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph