GIMANDO ni Gingoog City Mayor Erick Cañosa ug Bise Mayor Peter Unabia ang matag balay sa kabarangayan nga magbaton og survival garden sa ilang tagsa-tagsa ka luna.
Kini agi og pagpangandam sa posibleng food crisis nga hatod sa coronavirus disease (Covid-19) kung diin dili pa masayran hangtod kanus-a kini molangtod nga krisis sa panglawas.
Ang lokal nga pangagamhanan ubos sa City Agriculture Office pangunahan ni City Agriculture Officer Merlina Berdelao nga mag apud-apud og libreng seedlings ug abuno nga itanom sa matag tugkaran sa kada balay sa syudad.
Ang survival garden o kitchen garden usa ka pamaagi sa lokal nga kagamhanan aron maaghat ang lumolupyo sa siyudad sa pagtanom og dalian nga utanon sa ilang tugkaran aron sa panahon nga mograbe ang sitwasyon sa Covid-19 naa silay maluto nga puno sa sustansya nga pagkaon nga dili na kining pulos sardinas ug noodles.
Gipalihok na ni Berdelao karon panahona ang mga agricultural extension workers inubanan sa barangay agriculture workers nga nagpahigayon sa kada barangay uban sa koordinasyon sa kapitan ug purok chairman aron massive ang kampanya sa gardening program sa gobyerno.
Ang mga lagutmon nga dali ra mutobo maoy ipang apod-apod sama sa liso sa okra, batong, sitaw, talong, pechay, upland kangkong ug abuno sa matag household.
Alang sab niadtong walay matamnan nga luna ug naa sa sentro nga bahin pwede ra mogamit og mga empty containers o mga recycled materials sama sa sako sa semento, mga ginamit nga plastic nga botilya sa softdrinks o bisan paman buak nga balde ug plangana.
Sa laing bahin, adunay lima hangtud napulo ka ektarya nga mga luna sa Sitio Civoleg, Barangay Lunotan ang gipa gahin nila Mayor Canosa ug Vice Mayor Unabia aron tamnan sa Camote, ug laing mga utanon.
Si Nicole Managbanag ang City Information Officer niingon nga karon panahona pabiling Covid-free ang siyudad ug walay person under investigation human ang siyudad maoy pinaka una nga siyudad sa lalawigan nga mideklarar og community quarantine.